ដោយ ៖ ខ្មែរដើម
អ្នកស្រី ហង់ សឿន រស់នៅចាប់ដៃជាមួយប្តឹងជាយោធាពិការត្រូវចិញ្ចឹមកូនប្តីតាំងពីនៅតូចៗចំនួន ៣នាក់ រហូតធំ ពេញវ័យ ដោយកូនស្រីច្បងទីមួយ មានប្តីឈ្មោះ វ៉ាន វ៉ាន់ ចំណែកកូនទី ២ ប្រុសឈ្មោះ វ៉ាន វ៉ន ក៏មានប្រពន្ធបែកផ្ទះ ហើយ កូនប្រុសពៅឈ្មោះ វ៉ាន វឿន ក៏មានប្រពន្ធចាកចេញពីគ្រួសារដោយកូនទាំង៣ សុទ្ធសឹងតែបានទទួលយកចំណែកកេរមរតកជាគោ និងដីរៀងៗខ្លួនអស់ហើយ ។ នៅពេលលោក សុខ វ៉ាន់ ស្លាប់ត្រូវបានកូនប្រុសពៅឈ្មោះ វ៉ាន វឿន ឃុបឃិតជាមួយមេប៉ុស្តិ៍រំលោភយកផ្ទះ ម្តាយដែលកំពុងដេកព្យាបាលជំងឺនៅឯស្រុកមោងប្ញស្សី ខេត្តបាត់ដំបង ដែលមានទំហំដី ៤៨ម៉ែត្រ គុណនឹង ៣៥០ម៉ែត្រ បង្កជាវិវាទប្តឹងឱ្យអ្នកស្រី ហង់ សឿន ចូលខ្លួនទៅបំភ្លឺតាមដីកាកោះសាលាដំបូងខេត្តពោធិ៍សាត់លើសំណុំរឿងព្រហ្មទណ្ឌលេខ ៧៧ ពីបទប៉ះពាល់កម្មសិទ្ធិឯកជនដែលប្រព្រឹត្តនៅភូមិប្រម៉ោយ ឃុំប្រម៉ោយ ស្រុកវាលវែង ខេត្តពោធិ៍សាត់ ។
បន្ទាប់ពីចៅក្រមស៊ើបសួរពាក់ព័ន្ធរឿងដីទំនាស់លើវត្ថុសំអាងរួចមក អ្នកស្រី ហង់ សឿន បានបញ្ជាក់ច្បាស់ថា ដីដែលគាត់សង់ផ្ទះរស់នៅសព្វថ្ងៃ គឺបានមកពីក្មួយប្រុសឈ្មោះ រុន សារ៉ាន់ ជាអ្នកឱ្យដោយបានធានាចុះហត្ថលេខាទទួលខុស ត្រូវថែមទៀតផង ។ បន្ទាប់ពីស្តាប់ការបំភ្លឺពីចុងចោទឈ្មោះ ហង់ សឿន រួចមក តុលាការបានឱ្យអ្នកស្រីធ្វើពាក្យសុំដីការក្សា ការពារដោយមានក្រឡាបញ្ជីវាយលិខិតឱ្យអ្នកស្រីផ្តិតមេដៃនៅថ្ងៃទី ២ ខែធ្នូ ឆ្នាំ២០១៣ ដោយឱ្យរង់ចាំថា នៅថ្ងៃទី ១៧ ខែធ្នូ ឆ្នាំ២០១៣ តុលាការនិងប្រថាប់ត្រាជូន ។ ស្រាប់តែនៅថ្ងៃទី ១៧ ខែធ្នូ ឆ្នាំ២០១៣ ស្របពេលដែលអ្នកស្រី ហង់ សឿន ទៅទទួលយកដីការរក្សាការពារក្រឡាបញ្ជីបានបញ្ជាក់ប្រាប់គាត់ថា មានប្រាក់ប៉ុន្មាន !? ពេលនោះអ្នកស្រីឆ្លើយថា មានតែ ១៥ម៉ឺនរៀលទេ គឺបូកទាំងសាហ៊ុយចុះឡើងផង ។ ប៉ុន្តែលោកក្រឡាបញ្ជីបានបញ្ជាក់ប្រាប់គាត់វិញថា ទាល់តែមាន ២០០ដុល្លារ ទើបអាចធ្វើបានរួចហើយ ក៏ឱ្យគាត់អង្គុយនិយាយជាមួយបុគ្គលិកស្រីម្នាក់និយាយគ្នារហូតដល់ម៉ោងចេញពីធ្វើការ តែម្តង ។
ដោយជនរងគ្រោះឈ្មោះ ហង់ សឿន បាននាំយកឯកសារពាក់ព័ន្ធជាច្រើននឹងពាក្យបណ្តឹងរួមទាំងវត្ថុតាងដែល អាចឱ្យរូបគាត់ និងប្តីបានមករស់នៅលើដីទំនាស់បានរៀបរាប់ឱ្យសារព័ត៌មានជាតិជួយចុះផ្សាយ ព្រោះថាកាលពីថ្ងៃទី ១១ ខែមករា ឆ្នាំ២០១៤ កន្លងទៅថ្មីៗនេះ ប្រជាពលរដ្ឋដែលមើលឃើញពីចំណាត់ការមេប៉ុស្តិ៍ឃុំប្រម៉ោយ ឈ្មោះ សំ សុទ្ធ ដឹកនាំ កម្លាំងមករឹបអូសយកផ្ទះអ្នកស្រី ទៅឱ្យឈ្មោះ វ៉ាន វឿន ទាំងបំពានបាននាំរូបអ្នកស្រីឱ្យមកគាស់ផ្ទះចូលនៅវិញ ។ ម៉្យាងវិញទៀតចង់បានដីការក្សាការពារលើដីដែលធ្លាប់រស់នៅ គឺត្រូវតុលាការទាមទារឱ្យបង់ ២០០ដុល្លារ ប្រាក់អាមេរិកថែមទៀតនោះ គឺសារព័ត៌មានជាតិមានតែផ្តល់ព័ត៌មាននេះជូន ឯកឧត្តម ឱម យ៉ិនទៀង ទេសរដ្ឋមន្ត្រី និងជាប្រធានអង្គភាពប្រឆាំងអំពើពុករលួយទេ ទើបអាចវិនិច្ឆ័យលើដីទំនាស់នេះ ប្រកបដោយប្រសិទ្ធភាពបាន ។ ព្រោះសារព័ត៌មានជាតិយល់ឃើញថា ការទាមទារប្រាក់ពីក្រឡាបញ្ជី ២០០ដុល្លារ គឺមានតែស្ថាប័នអង្គភាពប្រឆាំងអំពើពុក រលួយទេ ទើបមានសមត្ថភាពស្វែងរកការដោះស្រាយ ស្របតាមជំនាញបានយ៉ាងពិតប្រាកដដែលអាចឱ្យជនរងគ្រោះទទួល បានដីការក្សាការពារស្របតាមគោលការនិតិរដ្ឋពិតប្រាកដ ៕
