ប្រជាពលរដ្ឋដែលទទួលបានការចុះបញ្ជីធ្វើប្លង់កម្មសិទ្ធិជាប្រពន្ធ័ក្ដី ធ្វើជាលក្ខណៈឯកជនក្ដី គឺមន្ត្រីជំនាញតម្រូវឲ្យរៀបចំឯកសារពីអាជ្ញាធរភូមិឃុំ ដោយមានការបញ្ជាក់ ស្នាមមេដៃពីម្ចាស់ដីជាប់ព្រំថែមទៀតផង ។ បន្ទាប់មកត្រូវយកឯកសារបិទប្រកាសពីភូមិបាលស្រុក ក្រុង ខណ្ឌទៅបិទនៅទីតាំងដីនិងសាលាឃុំ សង្កាត់រយះពេល15ថ្ងៃ បើគ្មានអ្នកតវ៉ាទើបអាចបន្តនិតិវិធីទៅមន្ទីរជំនាញខេត្តបាន ។ ការអនុវត្តន៍ធ្វើប្លង់តាមបែបផែនបច្ចេកទេសបែបហ្នឹង គេពុំសូវឃើញមានករណីវិវាទដីធ្លីកើតឡើងនោះទេ។
បច្ចុប្បន្ន គ្រាន់តែនៅអាណាចក្រខេត្តកណ្ដាលមួយ កើតមានករណីវិវាទដីធ្លីច្រើនណាស់ ដែលផ្ដើមចេញពីប្លង់ធ្លាក់ពីលើមេឃ ។ តួយ៉ាងករណីវិវាទដីធ្លីនៅទួលពន់រៃក្នុងស្រុកស្អាង ខេត្តកណ្ដាល ត្រូវបានឈ្មោះ វី មេការឧកញ៉ា សំ ប៊ន ប្រាប់ពលរដ្ឋដែលអាស្រ័យផល 30 ទៅ 40 ឆ្នាំ ហើយបើមិនព្រមលក់ដីឲ្យ ក៏គេយកដែរ ។ រហូតមានមន្ត្រីមន្ទីរសូរិយោដីឈ្មោះ នី បានប្រាប់ថា ដីដែលប្រជាពលរដ្ឋអាស្រ័យផលជាន់លើប្លង់ធ្លាក់ពីលើមេឃរបស់ឈ្មោះ កុយ វី មេការឧកញ៉ាសំ ប៊នហើយទាំងប្រជាពលរដ្ឋកំពុងអាស្រ័យផលពុំបានដឹងអ្វីទាំអស់។
មិនខុសអ្វីពីករណីវិវាទដីធ្លីនៅភូមិក្របៅ 1 ភូមិក្របៅពីរ ក្រុងអរិយក្សត្រ ខេត្តកណ្ដាល ដែលពលរដ្ឋអាស្រ័យផលរាប់ឆ្នាំមកហើយ ស្រាប់តែលេចចេញម្ចាស់ប្លង់ដែកថែបធ្លាក់ពីលើមេឃ ប្ដឹងចោទម្ចាស់ដីដែលអាស្រ័យផលរាប់សិបឆ្នាំមកហើយទៅវិញ។
ក្នុងខេត្តកណ្ដាលតែមួយ នៅមានករណីវិវាទដីធ្លីច្រើនទៀតដូចជានៅឃុំកំពង់ចម្លងស្រុកខ្សាច់កណ្ដាលក៏ផ្ដើមចេញពីប្លង់ធ្លាក់ពីលើមេឃដែ ។ ហើយពេលនេះឮថាអភិបាលស្រុកបានកោះអញ្ជើញប្រ ជាពលរដ្ឋដែលពាក់ព័ន្ធឲ្យទៅដោះស្រាយនៅសាលាស្រុក។
គេហទំព័រកាសែតជាតិពុំមានសិទ្ធិអំណាចអ្វី ក្រៅពីសំណូមពរគោរពជូន ឯកឧត្ដម ឧបនាយករដ្ឋមន្ត្រី សាយ សំអាល់ រដ្ឋមន្ត្រីក្រសួងរៀបចំដែនដី នគរូបណីយកម្ម និងសំណង់ ដើម្បីរួមចំណែកលើចក្ខុវិស័យដ៏ខ្ពង់ខ្ពស់របស់ឯកឧត្ដមដែលតម្រូវឲ្យរួមគ្នា បង្កើតបរិយាកាសបញ្ចប់វិវាទដីធ្លី ហើយក៏ដើម្បីធានាដល់សិទ្ធកាន់កាប់ដីប្រកបដោយនិរន្តរភាព មិនថាប្រទេសយើងប្រែប្រួលទៅជាបែបណាឡើយ។
ជាកង្វល់នឹងសូមចូលរួមចំណែកដើម្បីបង្កើតបរិយាកាសបញ្ចប់វិវាទដីធ្លីបាន គឺមានតែនិរាករណ៍ប្លង់ធ្លាក់ពីលើមេឃ មិនទទូលស្គាល់តម្រូវឲ្យអនុវត្តធ្វើប្លង់ស្របតាមបទដ្ឋានបច្ចេកទេស ដោយមានការបិទប្រកាសនឹងផ្សព្វផ្សាយតាមទូរទស្សន៍ជាតិដោយមិនគួរបែងចែកឋានះបុណ្យស័ក្តិមានងារជាឧកញ៉ាអ្វីឡើយ។ ពុំនោះទេបើនៅតែទុកឲ្យកើតមានប្លង់ពួកអ្នកមានលុយ មានអំណាចចេញប្លង់ធ្លាក់ពីលើមេឃដូចករណីនៅស្រុកស្អាង នៅក្រុងអរិយក្សត្រនិងស្រុកខ្សាច់កណ្ដាលនាពេលនេះ ពិតជាមិនអាចបញ្ចប់វិវាទដីធ្លីតាមការគ្រោងទុករបស់ក្រសួងបានឡើយ ៕
