ខេត្តរតនគិរីៈ មេឈ្មួញម្នាក់ ដែលជាស្ត្រី ដ៏ល្បីឈ្មោះ នៅស្រុក តាវែង ដែលគេ ស្គាល់ឈ្មោះថា យាយទូចបាននឹងកំពុងតែ កាប់បំផ្លិចបំផ្លាញ ព្រៃឈើ នៅតាមតំបន់ ព្រៃសហគមន៍ និងតំបន់ព្រៃភ្នំ ជាច្រើនទៀត នៅក្នុងឃុំ តាវែងក្រោម ស្ថិតក្នុងភូមិ ផ្ស៉ាង ដើម្បីយក ឈើប្រណិត គ្រប់ប្រភេទ ដូចជា ឈើធ្នង់ ឈើបេង ឈើនាងនួន ដោយប្រើមធ្យោបាយ ដាក់ម៉ាស៊ីន ត្រង់ស៊ីន័រ តូចធំ អោយកម្មករ ជាច្រើនាក់ ដែលមកពី ខេត្ត កំពង់ស្ពឺ ព្រៃវែង ខេត្ត តាកែវ ចូលអារឈើ និងជ្រៀក ឈើប្រណិត ទាំងនោះ លាន់លឺទ្រហឹង ពេញព្រៃភ្នំ មិនតែប៉ុណ្ណោះ មេឈ្មួញ កាប់បំផ្លាញព្រៃឈើ រូបនោះ បានប្រើត្រាក់ទ័រ ចំនួន២គ្រឿង និងរទះក្របី ចំនួន៨គ្រឿងដើម្បីធ្វើ ជាមធ្យោបាយ អូសទាញ និងដឹកជញ្ជូនឈើ ប្រណិតទាំងអស់នោះ ចេញពីតំបន់ភ្នំ និងព្រៃសហគមន៍ ឆ្លងអូរ ដែលរថយន្ត ចូលមិនដល់ ក៏យកមកដាក់ នៅមាត់ទន្លេ កំពង់ដរ ភូមិផ្សាង ឃុំ តាវែងក្រោម ។ ហើយនឹង ដឹកជញ្ជូន បណ្តែតតាមទូកតូច ធំ គ្រប់ប្រភេទ យកមកដាក់នៅ កំពង់ដរ នានា នៅទីរួមស្រុក តាវែង និងកំពង់ដរ នៅមុខទីបញ្ជាការ កងរាជអាវុធហត្ថ ស្រុក តាវែង ដើម្បីយកអោយ ក្រុមហ៊ុន និងមេឈ្មួញដទៃទៀត ដែលឈរចាំទិញ នៅស្រុក តាវែង ។
បើតាមប្រភព ពីប្រជាពលរដ្ឋ ដែលសុំមិនបញ្ចេញឈ្មោះ នៅស្រុក តាវែង បានអោយដឹងថា គេសង្កេតឃើញ នៅស្រុក តាវែង ការធ្វើជំនួញឈើប្រណិត ខុសច្បាប់ ដូចជា ផ្សារត្រី ទៅហើយ ដែលពួកគាត់មិនដែលឃើញ មានសមត្ថកិច្ច ចុះបង្ក្រាប បានម្តងណាឡើយ ព្រោះថាអ្នកដែល អាចរកស៊ីឈើប្រណិត ខុសច្បាប់នេះបាន ភាគច្រើន គឺពួកគេសុទ្ធតែ ជាសមត្ថកិច្ច រឺអាចជាប់ខ្សែ សមត្ថកិច្ច ទើបអាចរកស៊ី របរនេះបាន ។ ប្រភពបានបន្ត អោយដឹងទៀតថា គ្រាន់តែនៅស្រុក តាវែង មានមេឈ្មួញ ដុះស្លែមិនតិច ជាង១៥នាក់នោះទេ ដែលពួកគេកំពុង តែកាក់កប រកផលចំណេញ បានយ៉ាងច្រើន ពីការកាប់បំផ្លិចបំផ្លាញ ដឹកជញ្ជូនឈើប្រណិត ខុសច្បាប់ យ៉ាងអនាធិបតេយ្យនេះ ហើយ កុំថាឡើយ ដល់ព្រៃហាមឃាត់ គឺព្រៃសហគមន៍រឺ តំបន់ភ្នំ ឧទ្យានជាតិវរៈជ័យ ក៏កំពុងតែ រងនូវការកាប់បំផ្លិចបំផ្លាញ យ៉ាងអនាធិបតេយ្យ ដែរ ដែល មន្ត្រីបរិស្ថាន មើលការ ខុស ត្រូវ តំបន់នោះ ហាក់បីដូចជា មិនទទួលខុសត្រូវ ឡើយ ។ ហើយបើទោះបីជា នៅពេលថ្មីៗនេះ ឯកឧត្តម យឹម ឆៃលី បានកោះហៅ ដល់មន្ត្រី ជំនាញពាក់ព័ន្ធ និងអភិបាលខេត្ត នៅតំបន់ភូមិភាគឦសាន ត្រូវតែរឹតបន្តឹង និងអនុវត្តន៍ បង្ក្រាបបទល្មើស ព្រៃឈើអោយ មានប្រសិទ្ធិភាព ដោយក្នុងនោះ ឯកឧត្តម បានលើជាគន្លិះថា ដើម្បីអនុវត្តន៍ អោយមានប្រសិទ្ធិភាព គួរតែអនុវត្ត ទៅតាម ស.ជ.ណ របស់រាជរដ្ឋាភិបាល ដែលបានចេញ ជាបន្តបន្ទាប់ រហូតដល់ទៅ ៤លើក រួចមកហើយ ដែលបាន ផ្តោតជាសំខាន់លើ ការរឹតបន្តឹង ទៅលើការបង្ក្រាប បទល្មើសនេសាទ បទល្មើសព្រៃឈើ ក៏ដូចជា ដឹកជញ្ជូនលើសទម្ងន់ រួមទាំងដីព្រៃផងដែរ ។ ប៉ុន្តែទោះជា យ៉ាងណាក៏ដោយ ក៏គេសង្កេត ឃើញថា នៅខេត្ត រតនគិរី នៅតែកើតមាន ជាបន្តបន្ទាប់ ដូចករណីនៅស្រុក តាវែង នេះស្រាប់ ៕
