ដោយ ៖ តាំង ឧសាន
ប្រជាពលរដ្ឋនៅស្រុកតាវែង ខេត្តរតនៈគីរី មានការភ្ញាក់ផ្អើលចំពោះក្រុមហ៊ុនចិនមួយ ដែលបាននាំគ្រឿង ចក្រចម្លែកមកតម្លើងនៅមាត់កំពង់ទន្លេសេសាន្ត ជាប់នឹងទីបញ្ជាការកងរាជអាវុធហត្ថស្រុកតាវែង ដោយសូម្បីតែ ឈ្មោះក្រុមហ៊ុនក៏ពួកគាត់ពុំបានដឹងផង ។ បើផ្អែកតាមការឱ្យដឹងពីប្រភពខ្លះបានអះអាង ដោយប្រយោលថា ជាក្រុមហ៊ុនចិនឈ្មោះ ឌី ស្កួវរីយ៍ បាននាំគ្រឿងចក្រមកតម្លើងដែលមានទំហំប៉ុនសាឡាងអ្នកលឿង ប៉ុន្តែអ្វីដែលជាចម្ងល់នោះ គឺប្រជាពលរដ្ឋដាក់ការសង្ស័យទៅលើប្រភេទគ្រឿងចក្រថា អាចមានសមត្ថភាពរុករករ៉ែ ក្រោមបាតទន្លេបាន ដោយជ្រកក្រោមរូបភាពអាជីវកម្មបូមខ្សាច់ ។
ពាក់ព័ន្ធទៅនឹងការនាំគ្រឿងចក្រដែលមានលក្ខណៈទំនើបហើយធំខុសប្លែកពីគ្រឿងចក្របូមខ្សាច់ដទៃទៀត ត្រូវបានលោកអភិបាលស្រុកតាវែង បញ្ជាក់ប្រាប់ថា ការនាំចូលគ្រឿងចក្ររបស់ក្រុមហ៊ុនរូបលោកក៏ពុំបានដឹងដែរ ។ ចំណែកអធិការនគរបាលស្រុកតាវែង ក៏បានបញ្ជាក់ដូចគ្នាទៅនឹងការអះអាងរបស់លោកអភិបាលស្រុក ប៉ុន្តែរឿងដែលចម្លែកនោះ គឺអ្នកបកប្រែឱ្យក្រុមហ៊ុនមិនបានបញ្ជាក់ឱ្យដឹង សូម្បីតែឈ្មោះក្រុមហ៊ុនរួមទាំងគ្រឿង ចក្រដែលនាំចូលមកក្នុងគម្រោងអភិវឌ្ឍន៍លើអ្វីឱ្យបានប្រាកដឡើយ ។
រយៈកាលកន្លងមកមានលេចឮព័ត៌មានថា ក្រុមហ៊ុនចិនបានប្រើគ្រឿងចក្ររុករករ៉ែមាសជ្រកក្រោមរូបភាព អាជីវកម្មបូមខ្សាច់នៅទន្លេសេសានក្នុងទឹកដីខេត្តស្ទឹងត្រែង បង្កផលប៉ះពាល់បរិស្ថានទឹកទន្លេមិនអាចប្រើប្រាស់បាន រហូតកើតមានជំងឺទាំងមនុស្ស និងសត្វថែមទៀតផង ។ ហើយការលាក់លៀមមិនបង្ហាញឱ្យដឹងពីព័ត៌មាននាំគ្រឿង ចក្រចូល ដែលមានទ្រង់ ទ្រាយធំ ហើយចម្លែកដោយសូម្បីតែអាជ្ញាធរមូលដ្ឋានស្រុកក៏បញ្ជាក់ថា មិនបានដឹងដែរនោះ តើអាចចាត់ទុកបានថា ជាសកម្មភាពស្របច្បាប់ដែលក្រុមហ៊ុនបាននិងកំពុងអនុវត្តដូចម្តេចកើត ។
ភ្នាក់ងារសារព័ត៌មានជាតិ បានទូរស័ព្ទទៅកាន់លោក ហែម វ៉ាន់ថន ប្រធានមន្ទីររ៉ែ និងថាមពលជាច្រើន លើក ដើម្បីសុំការបំភ្លឺពីអាជ្ញាប័ណ្ណរបស់ក្រុមហ៊ុនដោយផ្តោតលើការអភិវឌ្ឍន៍អ្វីឱ្យពិតប្រាកដ ! ប៉ុន្តែទូរស័ព្តរោទិ៍ជា ច្រើន តែគ្មានអ្នកទទួលទៅវិញ ។ ប្រជាពលរដ្ឋសង្ឃឹមថា ក្រសួងបរិស្ថាន និងចាត់វិធានការគ្រប់គ្រងទន្លេសេ សានក្នុងទឹកដីស្រុកតាវែង ខេត្តរតនគីរី កុំឱ្យជួបគ្រោះអាសន្នដូចករណីនៅខេត្តស្ទឹងត្រែងទៀត ៕
