ប្រជាពលរដ្ឋ 8 គ្រួសារបានដាក់លិខិតស្នើសុំអន្តរាគមន៍ដាក់កម្មវត្ថុស្នើសុំអភិបាលនៃគណៈអភិបាលខេត្តកណ្ដាលស្ថិតក្នុងដែនអំណាចឯកឧត្ដមគង់ សោភ័ណ្ឌអស់រយៈពេលជិតមួយឆ្នាំដោយបានបន្តស្នើសុំចូលអភិបាលខេត្តថ្មីដែលមកដឹកនាំជំនួសអភិបាលខេត្តចាស់គឺឯកឧត្ដមគួច ចំរើន តាំងពីថ្ងៃទី02 ខែកក្កដា ឆ្នាំ2024 ដើម្បីស្នើសុំចុះបញ្ជីធ្វើប័ណ្ណកម្មសិទ្ធរហូតដល់បច្ចុប្បន្ននៅមិនទាន់ទទួលបានការសម្រេចណាមួយឡើយ ។ ដោយការស្នើសុំចុះបញ្ជីដីធ្លីរបស់ប្រជាពលរដ្ឋ 8 គ្រួសារមានការជុំរុញពីភូមិបាលស្រុកស្អាងឲ្យទៅស្នើសុំក្រសួងរៀបចំដែនដី ទើបនៅថ្ងៃទី 06 ខែវិច្ឆិកា ឆ្នាំ2024 បានធ្វើលិខិតសុំអន្តរាគមន៍ពីឯកឧត្ដមឧបនាយករដ្ឋមន្ត្រីរដ្ឋមន្ត្រីក្រសួងរៀបចំដែនដី ដើម្បីទទួលបានសិទ្ធិចុះបញ្ជីធ្វើវិញ្ញាបនបត្រស្របច្បាប់ ។
ឆ្លងកាត់ដំណាក់កាលប្ដឹងសុំអន្តរាគមន៍ទៅក្រសួងមានរយៈពេល6ខែទើបឯកសារធ្លាក់ដល់ដៃនាយកដ្ឋានអធិការកិច្ចដោយមានការពិនិត្យពីលោកភីន ចាន់ធីន បានធ្វើការចោទសូរថាតើរូបភាពផ្ទះដែលជាប់នឹងផ្លូវទាំងពីរនឹងម្ដេចអាចចោទថាជាដីអាងកើតទៅ ។ ចម្លើយគឺទាល់តែលោកចុះទៅពិនិត្យជាក់ស្ដែងទើបដឹងថាជាដីអាងឬដីលំនៅដ្ឋានរបស់ប្រជាពលរដ្ឋឲ្យពិតប្រាកដបាន ។ បន្ទាប់មកលោក ភីន ចាន់ធីនយកកុំព្យូទ័រមកវាយធ្វើកំណត់ហេតុរួចប្រាប់មកខ្ញុំបាទថាមិនអាចសរសេរដាក់ថាមន្ត្រីជំនាញមិនបានចុះបញ្ជីដីធ្លីឲ្យនោះទេ ព្រោះពាក្យស្នើសុំអន្តរាគមន៍ខុសពីឯកសារស្នើសុំចុះបញ្ជីដែលម្នាក់ត្រូវទិញពីភូមិបាលស្រុកចំនួន4ច្បាប់មកបំពេញ បើមន្ត្រីមិនធ្វើឲ្យទេឲ្យគេចោទមកវិញថាមកពីមូលហេតុអ្វីចាំដាក់ពាក្យមកក្រសួងម្ដងទៀត ។
ក្រោយពីស្ដាប់ការណែនាំពីមន្ត្រីអធិការកិច្ចក្រសួងប្រជាពលរដ្ឋ8គ្រួសារបានទិញពាក្យស្នើសុំចុះបញ្ជីពីមន្ទីររៀបចំដែនដីខេត្តកណ្ដាលយកទៅជួបមន្ត្រីភូមិបាលស្រុកដោយលោកប្រធានភូមិបាលប្រាប់ថាមិនអាចបញ្ជាក់បានទេព្រោះបើទៅបញ្ជាក់នៅសាលាឃុំក៏មេឃុំឲ្យមកសុំឯកភាពពីភូមិបាលស្រុកដដែល ។ ក្នុងគ្រានោះដែរលោក ពន់ លៃ ដែលជាអនុប្រធានភូមិបាលស្រុកបានបញ្ជាក់ថាជាដីអាងទួលពន់រៃដែលបានចុះបញ្ជីតាំងពីឆ្នាំ2005មកម្ល៉េះ ។ នៅពេលសួរលោកពន់លៃថាបើតាមការបញ្ជាក់ពីលោកស៊ីម ភី កាលពីថ្ងៃទី23 ខែសីហា ឆ្នាំ2023 គឺមន្ត្រីភូមិបាលស្រុកឈ្មោះ គ្រួច សុត និងឈ្មោះ អ៊ុំ ឡុង បានយកឯកសារឲ្យគាត់ចុះហត្ថលេខាគឺមានរយៈពេលជិតមួយឆ្នាំហើយម្យ៉ាងវិញទៀតរូបគាត់ចូលនិវត្តន៍8ឆ្នាំហើយគឺតាំងពីឆ្នាំ2015ក្នុងតួរនាទីប្រធានការិយាល័យធនធានទឹកស្រុកស្អាងដោយសន្យាថាឧកញ៉ានឹងឲ្យឡានគាត់មួយតែគាត់ទទួលបានលុយតែមួយរយដុល្លាប៉ុណ្ណោះ ។
ក្នុងនាមប្រជាពលរដ្ឋ8គ្រួសារសូមចោទសួរត្រង់ៗថាតើនិតិវិធីដែលមន្ត្រីភូមិបាលស្រុកស្អាងរៀបចំឯកសារឲ្យអតីតៈប្រធានការិយាល័យធនធានទឹកចុះហត្ថលេខានៅឆ្នាំ2023រួចចុះក្នុងបញ្ជីនៅឆ្នាំ2005តើវាសមស្របដែរឬទេ។ ឬថា ជានិតិវិធីដែលមន្ត្រីភូមិបាលស្រុកស្អាងឃុបឃិតជាមួយក្រុមឈ្មួញស្វែងរកផលប្រយោជន៍តាមរយៈទៅបង្ខំឲ្យប្រជាពលរដ្ឋលក់ដីស្រែដីផ្ទះឲ្យក្នុងតម្លៃថោកៗដោយគម្រាមថាជាដីអាង ។
នៅពេលចោទសួរថាដីអាងរដ្ឋម្ដេចក៏ឈ្មួញអាចដើរទិញពីពលរដ្ឋរួចធ្វើប្លង់បានយ៉ាងងាយស្រួលបែបហ្នឹង ពេលនោះលោកមន្ត្រីភូមិបាលស្រុកបានបញ្ជាក់មកទិញថាមកពីពួកឈ្មួញគេទទួលបាន សជណ ពីខេត្ត ម្យ៉ាងបាក្យបណ្ដឹង8គ្រួសារក៏ទៅដល់ខេត្តហើយដែរ រង់ចាំតែថ្ងៃបើកប្រជុំហើយរូបលោកក៏ត្រូវចូលរួមប្រជុំដោះស្រាយដែរ ទើបមិនអាចបញ្ជាក់តាមការសុំពីតំណាងប្រជាពលរដ្ឋបាន។ តើនិតិវិធីបែបនេះឬដែលថ្នាក់ដឹកនាំតែងក្រើនរំឮកថាមន្ត្រីគ្រប់រូបគឺជាអ្នកបំរើរាស្ដ្រ តើសកម្មភាពមន្ត្រីបែបនេះឬគឺជាសកម្មភាពបំរើរាស្ត្រនោះ?៕
