ដោយ រ៉ាយ ភុន ៖ ឈ្មោះ ចាន់ ដាវិត អាយុ22ឆ្នាំ ភេទប្រុស មានទីលំនៅក្នុង ភូមិប្រម៉ោយ ឃុំប្រម៉ោយ ស្រុកវាលវែង ខេត្តពោធិសាត់ ត្រូវបានចាប់ខ្លួន នៅពេលកំពុងកាប់ព្រៃ នៅចំណុចទំនប់ ស្ទឹងអូរសោមទី3 កាលពីថ្ងៃទី07 កុម្ភៈ 2022 បញ្ជូនមកឃុំខ្លួននៅ មន្ទីរបរិស្ថាន ខេត្តពោធិសាត់ ដោយកម្លាំងដែន ជម្រកសត្វព្រៃជួរ ភ្នំក្រវ៉ាញកណ្ដាល ដែលមានលោក រី ភារម្យ ជាប្រធាន ។ ប្រភពក្រៅផ្លូវការ បានបញ្ជាក់ថាឈ្មោះ ចាន់ ដាវិត គ្រាន់តែជាអ្នកស៊ីឈ្នួល កាប់រានដីព្រៃឲ្យ អ្នកដែលជួលតែប៉ុណ្ណោះ ដែលតម្រូវឲ្យមានការ សិក្សាស្វែងយល់ពី ប្រភពអ្នកជួលបន្តទៀត ។
វាជាករណីដែលចម្លែក ឈ្មោះ ចាន់ ដាវិត ដែលត្រូវនាំខ្លួនមក ឃុំនៅមន្ទីរបរិស្ថាន ខេត្តពោធិសាត់ មិនទាន់ទាំងបានសួរនាំ ពីមន្ត្រីជំនាញដើម្បីកសាង សំណុំរឿងបញ្ជូនទៅ តុលាការផងក៏ ស្រាប់តែលេចឮដំណឹង ថាបានធ្វើអត្តឃាតនៅ ក្នុងបន្ទប់ឃុំឃាំងរបស់ មន្ទីរបរិស្ថាន នៅថ្ងៃទី08 កុម្ភៈ 2022 វេលាម៉ោង8 និង40នាទីព្រឹកទៅវិញ ។ ដើម្បីស្វែងយល់ពីករណី អត្តឃាតក្នុងបន្ទប់ឃុំឃាំង របស់មន្ទីបរិស្ថាន ខេត្តពោធិសាត់ សូមអ្នកតាមដានមេត្តា ពិនិត្យលើរបាយការណ៍ មន្ត្រីជំនាញដូចខាងក្រោម៖
សូមគោរពជូនរបាយការណ៍
+ករណីអត្តឃាត (ចងកសម្លាប់ខ្លួន)
-នៅវេលាម៉ោង០៨ និង៤០នាទី ថ្ងៃអង្គារ ០៧កើតខែមាឃ ឆ្នាំឆ្លូវត្រី ស័ក ពស ២៥៦៥ ត្រូវនឹងថ្ងៃទី០៨ខែកុម្ភៈ ឆ្នាំ២០២២ បានទទួលដំណឹងពីលោក ផាន់ សុភារីន ឋានៈនាយកដែនជំរកសត្វព្រៃ ភ្នំសំកុស មានករណីអត្តឃាត (ចងកសម្លាប់ខ្លួន) មួយកើតឡើង នៅ ក្នុងបន្ទប់ឃុំឃាំង របស់មន្ទីរបរិស្ថាន ខេត្តពោធិសាត់ ក្នុងភូមិពាលញែក១ សង្កាត់ផ្ទះព្រៃ ក្រុងពោធិសាត់ ខេត្តពោធិ៍សាត់ វេលាម៉ោង០៨ និង៣០នាទីថ្ងៃទី០៨ខែកុម្ភៈឆ្នាំ២០២២។
-ការពិនិត្យទីកន្លែង កើតហេតុឃើញមាន
–តាងលេខ១ គឺទ្វារចូលបន្ទប់ឃុំឃាំង មន្ទីរបរិស្ថាន
-តាងលេខ២ គឺកាកសំណល់បាយនិងទឹក
-ខាងត្បូងលេខ២ ចម្ងាយ៥០ ស.ម គឺស្បែកជើង (តាងលេខ៣)
-ខាងជើងលេខ៣ចម្ងាយ៨០ ស.ម គឺបន្ទប់ទឹកដែលជា កន្លែងកើតហេតុ(តាងលេខ៤)
-ខាងត្បូងលេខ២ ចម្ងាយ ១៣០ ស.មគឺកន្លែងដេក (តាងលេខ៥) ។ យើងពិនិត្យឃើញថា សាកសពចងក ជាមួយនឹងកន្សែងពោះគោ ពណ៌ក្រហម ចងទៅនឹងព្រិលជញ្ជាំថ្ម បន្ទប់ទឹកដែលមានកម្ពស់២៦៣ស.ម ពីឥដ្ឋការ៉ូដល់ព្រិល សម្រាប់ចងក។
ការពិនិត្យសាកសព នៅវេលាម៉ោង១ ០និង១៥នាទីដល់ម៉ោង១០និង៤៥នាទីថ្ងៃទី៨-០២-២០២២ ពិនិត្យសាកសពជាមួយ គ្រូពេទ្យជំនាញ ឃើញថាសាកសពត្រូវ បានកាត់ចំណងស្រាយទម្លាក់ដាក់ក្បាល ទៅទិសខាងលិច សាកសពឈ្មោះ ចាន់ វីតអាយុ២២ឆ្នាំ ភេទប្រុស ជនជាតិខ្មែរ មានកំពស់១.៦៥ម៉ែត្រ សម្បុរខ្មៅស្រអែម សក់ខ្លី សាកសពស្លៀកជើងខ្លី ពណ៌ខ្មៅពាក់អាវយឺត ខ្មៅដៃខ្លី
– សាកសពមានសភាព រឹងគ្រប់សន្លាក់ ។
-ផ្នែកក្បាល គ្មានស្លាកស្នាមអ្វី
-ផ្នែកក មានស្នាមទ្រុឌជាកន្លះ រង្វង់ជំរៅ១ស.មគុណ២,៥ស.ម។
-ផ្នែកដងខ្លួន ខាងក្រោយខ្នងមានរូបសាក់
-អវៈយវៈ កំភួនដៃទាំងសងខាងមានរូបសាក់
-ប្រដាប់ភេទមានចេញទឹកកាម និងទឹកនោម និងទ្វាលាមក គ្មានលាមក ។
យើងបានពិនិត្យតែផ្នែក ខាងក្រៅនៃសពប៉ុណ្ណោះ ក្រៅពីនេះកំលាំងយើង ពុំបានពិនិត្យឃើញ អ្វីផ្សេងទៀតទេ។
+យោងតាមការបំភ្លឺជុំវិញ ទីកន្លែងកើតហេតុ និងការពិនិត្យសាកសព ជាមួយគ្រូពេទ្យជំនាញ
+យើងសន្និដ្ឋានបានថា
-សាកសពឈ្មោះ ចាន់ វីត ស្លាប់បណ្តាលមកពី ចងកធ្វើអត្តឃាត ពិតប្រាកដមែន។
-សពស្លាប់អាចលើស ពី០២ម៉ោងឡើង
-សាកសពបានប្រគល់ អោយឈ្មោះ ផាន់ សុភារីន ភេទប្រុស ជនជាតិខ្មែរ ឋានៈនាយកដែនជំរកសត្វព្រៃភ្នំសំកុស ដើម្បីចាត់ចែងបន្តនីតិវិធីច្បាប់។
