លោកយាយ ហ៊ិន​ គៀវ សម្រេចប្ដឹង ឧទ្ទរណ៍ព្រោះរង ភាពអយុត្តិធម៌ នៅសាលាដំបូង ខេត្តព្រះសីហនុ

(ខេត្តព្រះសីហនុ)៖ លោកយាយ ឈ្មោះ ហ៊ិន គៀវ ដែលមានអាយុ៧០ឆ្នាំ ទៅហើយនោះ បានសម្រេចដាក់ពាក្យបណ្តឹងឧទ្ធរណ៍ដើម្បីទាមទាររកយុត្តិធម៌ពាក់ព័ន្ធរឿងទំនាស់ដីធ្លី មួយកន្លែងរវាងរូបគាត់និងឈ្មោះ គង់ ឈុន ទំហំប្រមាណ៣ហិកតា ស្ថិតក្នុងភូមិ១ សង្កាត់លេខ៤ ក្រុងព្រះសីហនុ ខេត្តព្រះសីហនុ។

លោកយាយ ហ៊ិន គៀវ បានបញ្ជាក់ថា បណ្តឹងឧទ្ធរណ៍នេះ គឺរូបគាត់ធ្វើឡើងក្រោយពេល សាលាដំបូងខេត្តព្រះសីហនុបានចេញសាលក្រមរដ្ឋប្បវេណីលេខ ៩០/១០ (ច) ចុះថ្ងៃទី៣១ ខែតុលា ឆ្នាំ២០១៩ សម្រេច ច្រានចោលការទាមទាររបស់គាត់លើបណ្តឹង តវ៉ាជាមួយនិង លោក គង់ ឈុន ដោយបញ្ហារនេះលោកយាយគិតថាគឺជារឿងអយុត្តិធម៌ខ្លាំងណាស់សំរាប់រូបគាត់ជាម្ចាស់ដីស្របច្បាប់។

ពាក់ព័ន្ធបញ្ហារទីតាំងដីទំនាស់ដីធ្លីខាងលើនេះ លោកយាយ ហ៊ិន គៀវ បានបញ្ជាក់បន្ថែមថា ដីនេះជាដីចំការស្វាយនិង ខ្នុររូបគាត់បានទិញពីឈ្មោះ ភូមិន្ធ តាំងពីឆ្នាំ២០០០ មកម្ល៉េះដោយការទិញលក់ក៏ដូចការផ្ទេរសិទ្ធិកាន់កាប់ សុទ្ធសឹងមានការបញ្ជាក់ទទួលស្គាល់ត្រឹមត្រូវតាមច្បាប់ពីសំណាក់អាជ្ញាធរមូលដ្ឋានរួមមាន លោក សែម ទី ជាប្រធានបណ្ឌល១ លោក សំ រិន្ទ ចៅសង្កាត់លេខ៤ និង លោក គង់ សា មឿន អភិបាលខណ្ឌមិត្តភាពផងដែរ។ ទីតាំងដីទំនាស់នេះគាត់បានធ្វើរបងព័ទ្ធជុំវិញនិងគ្រប់គ្រងយ៉ាងសុខសាន្តតាំងពីនោះមក មិនដែលមានបញ្ហារអ្វីនោះទេ។ ប៉ុន្តែ ក្រោយមកនៅឆ្នាំ២០០៥ ក៏ស្រាប់តែ ឈ្មោះ គង់ ឈុន បានធ្វើការអះអាងថាដីដែលរូបគាត់ កំពុងកាន់កាប់ជាក់ស្តែងនេះថាជាដីរបស់ខ្លួនទៅវិញព្រមទាំងបានបញ្ជាឲ្យមនុស្សចំនួន៣នាក់ មានឈ្មោះ តា ហេង ឈ្មោះ តាកៀន និងឈ្មោះ សាន្ត កក្តា ជាប៉ូលិស សណ្តាប់ធ្នាប់ចុះទៅដកបង្គោលរបងកាប់បំផ្លាញផលដំណាំលើដីចោលអស់និង រុះផ្ទះរបស់គាត់ចំនួន២ខ្នង ដែលរូបគាត់សាងសង់ឲ្យអ្នកយាមដីស្នាក់នៅអស់គ្មានសល់ និងបានបណ្តេញក្រុមអ្នកយាមដីរបស់គាត់ឲ្យចាក ចេញពីទីតាំងដីទៀតផង។

ក្រោយពីមានបញ្ហារដូចរៀបរាប់ខាងលើ រូបគាត់ក៏បានដាក់ពាក្យបណ្តឹងទៅសាលាដំបូងខេត្តព្រះសីហនុដើម្បីទាមទារយុត្តិធម៌ លុះក្រោយមកសាលាដំបូងខេត្តព្រះសីហនុ បានចេញសាលក្រមរដ្ឋប្បវេណីលេខ ៩០/១០ (ច) ចុះថ្ងៃទី៣១ ខែតុលា ឆ្នាំ២០១៩ សម្រេចច្រានចោលការទាមទាររបស់រូបគាត់ ព្រមទាំងតម្រូវឲ្យរូបគាត់ផ្តល់សំណងជម្ងឺចិត្តឱ្យទៅចុងចម្លើយឈ្មោះ គង់ ឈុន ចំនួន៤.០០០.០០០ (បួនលាន) រៀលទៀ តផង។

ការសម្រេចសេចក្តីរបស់សាលាដំបូងខេត្តព្រះសីហនុខាងលើនេះគឺ អយុត្តិធម៌ខ្លាំងណាស់សំរាប់រូបគាត់និងធ្វើឱ្យប៉ះពាល់ដល់ផលប្រយោជន៍ស្របច្បាប់ចំពោះរូបគាត់យ៉ាងធ្ងន់ធ្ងរណាស់ប៉ុន្តែទោះជាយ៉ាង ណាក៏ដោយរូបគាត់សង្ឃឹមថាបណ្តឹងឧទ្ធរណ៍របស់គាត់និងទទួលបានសុក្រិត្យ និងយុត្តិធម៌ មកវិញ។

ដោយឡែកជុំវិញបញ្ហារខាងលើនេះ លោក គង់ ឈុន ភ្នាក់ងារសារព័ត៌មានយើងប្រចាំខេត្តព្រះសីហនុមិនអាចសុំការបំភ្លឺបានទេ ពីព្រោះគ្មានលេខទូរស័ព្ទ ៕