ចាប់តាំងពីម៉ោង ៦ ព្រឹក រហូតដល់ម៉ោង ៩ ថ្ងៃទី ១៩ កក្កដា ឆ្នាំ ២០១៣ អ្នកគាំទ្របក្សសង្គ្រោះជាតិចាប់ផ្តើមធ្វើដំណើរមកពីកន្លែងផ្សេងៗគ្នា ចូលទៅកាន់ដងវិថីសហព័ន្ធរុស្ស៊ី ធ្វើឲ្យកកស្ទះចរាចរណ៍ជាច្រើនម៉ោង ពិសេស គឺអ្នកធ្វើដំណើរពិតជាមិនអាចឆ្លងកាត់មហាវិថីនេះបានទេ លើកលែងតែធ្វើដំណើរក្រោមស្ពានអាកាស ៧ មករា ។
តាមការប៉ាន់ស្មានមានអ្នកចូលរួមគាំទ្រដំណើរវិលត្រឡប់របស់លោក សម រង្ស៊ី ប្រធានគណបក្សសង្គ្រោះជាតិមិនតិចជាង ៤ ម៉ឺននាក់ឡើយ បើទោះបីមានការគ្រោងទុកពីគណបក្សសង្គ្រោះជាតិ ក្នុងចំនួនមិនលើសពី ២០០០០ ក្តី ។
កំណើនមនុស្សចូលរួមទទួលទ្វេដងនៅតាមដងផ្លូវ សហព័ន្ធរុស្ស៊ី រហូតដល់មុខព្រលានយន្តហោះភ្នំពេញភាគច្រើន គឺផ្តើមចេញពីការស្ម័គ្រចិត្តរបស់បុគ្គលនិងក្រុមនិមួយៗ ទោះបីគ្មានការរៀបចំកំណត់ពីបក្សសង្គ្រោះជាតិក្តី ។ វត្តមានលោក សម រង្ស៊ី ពេលនេះ គេសង្កេតឃើញអ្នករួមដំណើរដ៏សំខាន់ម្នាក់ គឺ លោក កឹម សុខា ដែលបានធ្វើដំណើរទៅទីក្រុងបាងកក រង់ចាំអមដំណើរមកជាមួយលោក សម រង្ស៊ី តែម្តង ។ រូបភាពទាំងអស់នេះ បង្ហាញពីការវិលត្រឡប់របស់លោក សម រង្ស៊ី ប្រធានគណបក្សសង្គ្រោះជាតិដោយអម ដំណើរជាមួយលោកអនុប្រធាន កឹម សុខា រួមទាំងអ្នកចូលរួមដ៏ច្រើនហួសពីការរំពឹងទុកថែមទៀតផង ។
ទោះបីមានការចូលរួមទទួលច្រើន ក៏ដំណើរវិលត្រឡប់ឆ្ពោះទៅកាន់ទីលានប្រជាធិបតេយ្យត្រូវបានកម្លាំងសមត្ថកិច្ចសម្រួលចរាចរណ៍បានដោយជោគជ័យ ៕
