ដោយ ៖ ជាតិ
ទោះបីករណីលោក សម រង្ស៊ី ត្រូវបានលោក ទេព នីថា អគ្គ លេខាធិការគណៈកម្មាធិការជាតិរៀបចំការបោះ ឆ្នោត ប្រកាស ជាសាធារណៈ ឱ្យដឹងតាមរយៈសារព័ត៌មាន ពាក់ព័ន្ធទៅនឹងការ ដាក់បេក្ខភាពតំណាងរាស្ត្រ ពិតជាមិនអាចបញ្ចូលឈ្មោះបាន ដោយផ្អែកលើច្បាប់បោះឆ្នោតក៏ពិតមែន ! ប៉ុន្តែប្រភពព័ត៌មាន ដែលផ្សព្វផ្សាយតាមវិទ្យុផ្សាយម្លេង ជាខេមរៈភាសា VOA បាន ឱ្យដឹងនាព្រឹកថ្ងៃទី ១៧ កក្កដា ឆ្នាំ ២០១៣ ថា គណបក្សសង្គ្រោះ ជាតិបានរៀបចំបែបបទដាក់បេក្ខភាពលោកប្រធានបក្សសង្គ្រោះ ជាតិ ឱ្យឈរឈ្មោះ តំណាងរាស្ត្រនៅខេត្តកណ្តាលរួចរាល់ ហើយ ។ នៅមិនទាន់មានការបញ្ជាក់ឱ្យដឹងពី គ.ជ.ប លើករណីដាក់បេក្ខភាពលោក សម រង្ស៊ី ប្រធានគណបក្ស សង្គ្រោះជាតិ ចូល ទៅក្នុងបញ្ជីឈ្មោះ បេក្ខភាពតំណាងរាស្ត្រខេត្តកណ្តាលនៅឡើយទេ ទោះបីមានការវិភាគថា ការសម្រេចលើកលែង ទោសដល់លោក សម រង្ស៊ី គឺជាសញ្ញាបើកផ្លូវឱ្យលោក សម រង្ស៊ី មានលទ្ធភាពចូលរួម ពេញលេញក្នុងឆាកនយោបាយ តំណាងឱ្យគណបក្សប្រឆាំងដ៏ធំនៅកម្ពុជាក៏ពិតមែន ។
ក្រុមអ្នកវិភាគលើដំណើរវិលត្រឡប់របស់លោក សម រង្ស៊ី បានសម្តែងនូវការជឿទុកចិត្តថា លោក សម រង្ស៊ី ពិត ជាអាច ទទួលបានសិទ្ធិឈរឈ្មោះ ជាបេក្ខភាពនាយករដ្ឋមន្ត្រី នៅក្នុងនីតិកាលទី ៥ នៃការបោះឆ្នោតជ្រើសរើស តំណាងរាស្ត្រ ។ ដើម្បីធានាដល់ការឈរឈ្មោះ ជាបេក្ខភាពនាយករដ្ឋមន្ត្រីបាន គឺតម្រូវដាក់បេក្ខភាពលោក សមរង្ស៊ី ឱ្យឈរឈ្មោះជា តំណាងរាស្ត្រជាមុនសិន ទោះបីជាការដាក់បេក្ខភាពត្រូវបានបិទបញ្ចប់ស្របតាមច្បាប់បោះឆ្នោត ប៉ុន្តែបើផ្អែកលើ ដំណោះស្រាយនយោបាយផ្សះផ្សាជាតិរបស់ប្រមុខរាជរដ្ឋាភិបាល គឺពិតជាមិនអាចទប់ស្កាត់មិន ឱ្យលោក សម រង្ស៊ី ឈរឈ្មោះ ជាតំណាងរាស្ត្រប្រចាំខេត្តកណ្តាល បាននោះឡើយ ។
ស្របពេលដែលការបោះឆ្នោតកាន់តែខិតជិតចូលមក ដល់តម្រូវឱ្យមានការរៀបចំនីតិវិធីចាំបាច់សម្រាប់ផ្តល់ឱកាស ឱ្យលោក សម រង្ស៊ី អាចមានលក្ខណៈសម្បត្តិគ្រប់គ្រាន់ ទើបដំណើរការធ្វើនយោបាយរបស់គណបក្សប្រឆាំង ប្រព្រឹត្តទៅបានស្របតាមចក្ខុវិស័យ ដែលលោកនាយករដ្ឋមន្ត្រី ហ៊ុន សែន សម្រេចដាក់សំណើរលើកលែងទោសលោកសម រង្ស៊ី ដើម្បីសុំក្តីសណ្តោសប្រណីលើកលែងទោសពីព្រះ មហាក្សត្រ ដែលបានសម្រេចឡាយព្រះហស្ថនៅថ្ងៃទី ១២ កក្កដា ឆ្នាំ ២០១៣ ៕
