ដោយ ៖ ជាតិ
នៅចំណុចភូមិយក្សឡោម ឃុំឡាបានសៀក ស្រុកបានលុង បាននិងកំពុងកើតមានសកម្មភាពដឹកឈើប្រណីត ឆ្ពោះទៅប្រទេសវៀតណាម តាមរថយន្តប្រភេទយីឌុបជាច្រើនគ្រឿង។ ដូចឃើញក្នុងរូបភាពនេះស្រាប់ បើទោះបីចម្ងាយ ផ្លូវដឹកទៅព្រំដែនវៀតណាម មានប៉ុស្តិ៍កម្លាំងសមត្ថកិច្ច និងមន្ត្រីជំនាញមេព្រៃ មិនតិចជាង ២០ កន្លែង ក៏រថយន្តខ្នាតធំដឹកឈើប្រណីតមួយនេះ អាចដឹកជញ្ជូនឈើយកទៅដល់ព្រំដែនវៀតណាម បានដោយសុវត្ថិភាព ដោយគ្រាន់តែចុះបង់លុយតាមប៉ុស្តិ៍និមួយៗគឺចប់ ។
ហេតុការណ៍ដឹកជញ្ជូនឈើប្រណីតនៅខេត្តរតនគីរី ដែលមានសភាពគគ្រឹកគគ្រេងបែបនេះ ត្រូវបានប្រជាពលរដ្ឋ អះអាងថា វាបានកើតឡើងស្របពេលមានយុទ្ធនាការបោះឆ្នោត ហើយមន្ត្រីជំនាញនិងកងកម្លាំងសមត្ថកិច្ចក៏ពុំសូវ ឃើញ បង្ក្រាបដែរ ដោយព្រមទទួលយកការសូកប៉ាន់ ហើយក៏អនុញ្ញៅតឱ្យឡានដឹកឈើបន្តដំណើរតទៅទៀត ។ រូបភាពឡាន ដឹកឈើនេះ ភ្នាក់ងារសារព័ត៌មានជាតិបានចុះថតនៅថ្ងៃទី ១០ ខែកក្កដា ឆ្នាំ ២០១៣ ដោយធ្វើ ដំណើរតាមអង្កេត រហូត ដល់ឡានដឹកឈើធ្វើដំណើរទៅដល់ព្រំដែនវៀតណាមថែមទៀតផង ។
ប្រសិនបើរយៈពេលនៃយុទ្ធនាការបោះឆ្នោត ត្រូវបានមន្ត្រីជំនាញនិងកល្លាំងសមត្ថកិច្ចគិតគូរតែពីរឿងឆ្លៀតឱកាស ស្វែងរកលាភសក្ការៈ ពីបទល្មើសព្រៃឈើ បញ្ហាព្រៃឈើនៅតំបន់ព្រៃភ្នំមួយនេះនឹងត្រូវបាត់បង់ក្នុងពេលឆាប់ៗនេះ ជាក់ជាមិនខាន ។ នៅពេលដែលបាត់បង់ព្រៃឈើកាន់តែមានទំហំធំ ដោយមិនអាចទប់ស្កាត់បាន តើមានមន្ត្រីណា ដែលជាអ្នកចេញមុខទទួលខុសត្រូវ ចំពោះការបំផ្លិចបំផ្លាញព្រៃឈើ បើមន្ត្រីជំនាញខាងទប់ស្កាត់ព្រៃឈើក៏បានឃុប ឃិត ជាមួយឈ្មួញទុច្ចរិតកាប់ឈើខុសច្បាប់ទៅហើយនោះ ។
ម៉្យាងវិញទៀត សិប្បកម្មខ្នាតធំនៅភូមិប៉ក់ធំ ឃុំប៉ក់ញែក ស្រុកអូយ៉ាដាវ ជាប់ព្រំដែនវៀតណាម គឺជាកម្មសិទ្ធិរបស់ មន្ត្រីអន្តោប្រវេសន៍ឈ្មោះ បុល ដោយជួលមេជៅងមកពីវៀតណាមជាង ១០ នាក់ឯណោះ ។ សិប្បកម្មនេះ ផលិត គ្រៀងសង្ហារឹមយកទៅលក់នៅវៀតណាម សួរថា តើសកម្មភាពរបស់លោក បុល បំផ្លាញព្រៃឈើយកទៅលក់ ដល់ បរទេស វាស្របច្បាប់ដែរឬអត់ទាន ៕
