ដោយ ជាតិ
ភ្នំពេញ៖ វាជារឿងដ៏អយុត្តិធម៌បំផុតសម្រាប់លោក អ៊ុង ដាំតារា បន្ទាប់ពីអាជ្ញាធរ ខណ្ឌដូនពេញ បានដឹកនាំកម្លាំងចុះអនុវត្តន៍ សាលក្រមរឹបអូស យកផ្ទះតម្លៃជាង ២ លានដុល្លារ ខណៈដែលកូនបំណុលបានជំពាក់លុយ ចងការប្រាក់ត្រឹមតែ ២០ ម៉ឺនដុល្លារ និងមានការ ខកខាន ត្រឹមមិនបង់ការមួយខែចំនួន៤ពាន់ដុល្លារប៉ុណ្ណោះរយៈពេលជាងពីរឆ្នាំដែលគិតជាសាច់បា្រក់មាន រហូតដល់ជាង ២៤ ម៉ឺន៥ពាន់ដុល្លារនោះ ។
ស្ថិតអំឡុងពេលកូនបំណុលមិនបាន បង់តាមការកំណត់ឲ្យបានត្រឹមត្រូវនោះម្ចាស់បំណុលឈ្មោះ គីង កញ្ញា បានយកលេសធ្វើការប្តឹងផ្តល់ទៅតុលាការឲ្យជួយរកយុត្តិធម៌និងទាមទារបំណុលមកវិញតាមអ្វី ដែលកូនបំណុលបានសន្យា។ ប៉ុន្តែក្នុងខណៈពេលប្តឹង ផ្តល់នេះ ឯកឧត្តម អង្គ វង្សវឌ្ឍនា រដ្ឋមន្រ្តីក្រសួងយុត្តិធម៌ក៏បានចេញលិខិតបង្គាប់ការមួយឲ្យកូនបំណុលយកប្រាក់ទៅតម្កល់នៅសាលាឧទ្ធរណ៍ ចំនួន២៤ម៉ឺន៥ពាន់ដុល្លារ ហើយកូនបំណុលក៏ធ្វើតាមទាំងអស់ ផ្ទុយពីម្ចាស់បំណុល ឈ្មោះ គីង កញ្ញា មិនបានមកយក លុយនោះទេ ហើយក៏មិនបានប្រគល់ប្លង់ផ្ទះឲ្យវិញដែរ។ លុះនៅថ្ងៃទី១ ខែកក្កដា ឆ្នាំ២០១៣ ស្រាប់តែមានមន្រ្តីសមត្ថកិច្ច និងអាជ្ញាធរខណ្ឌដូនពេញនាំគ្នាចុះមកអនុវត្តន៍សាលក្រមរឹបអូសយកផ្ទះរបស់ឈ្មោះ អ៊ុង ដាំតារាទាំងអយុត្តិធម៌ ដើម្បីលក់ឡៃឡុងទៅវិញ ដោយករណីនេះត្រូវបានគេសង្ស័យថាអាចមានការឃុបឃិតគ្នារវាងម្ចាស់បំណុល និងមន្រ្តីតុលាការ ព្រមទាំងមន្ត្រីមានអំណាចណាមួយនៅពីក្រោយមិនខាន ។
មេធាវីនិងសាច់ញាតិម្ចាស់ផ្ទះបានធ្វើសន្និសីទកាសែតភ្លាមៗថា ផ្ទះនេះត្រូវបានគេលួចលក់ដោយខុសច្បាប់ និងបានអំពាវនាវរកយុត្តិធម៌។ សាច់ញាតិ និង លោក លូង សុខា ជាមេធាវីកាពារក្តីឲ្យលោក អ៊ុង ដាំតារាបានចោទប្រកាន់ម្ចាស់ បំណុល ឈ្មោះ គីង កញ្ញា និងឈ្មោះ សុខ រ៉ាថន និងភរិយាពីបទថាបានឃុបឃិតលួចលក់ ផ្ទះនិង ដីទំហំ៦៦៣ម៉ែត្រការ៉េ ក្នុងតម្លៃ២លានដុល្លាអាមេរិក កាលពីខែកុម្ភះ ឆ្នាំ២០១៣ ។ មុនករណីផ្ទុះវិវាទមិនបង់ការប្រាក់ទៅទៀត ។ លោក យូ ស៊ីច័ន្ទតារដ្ឋជាប្អូន ប្រុសលោក អ៊ុង ដាំតារា បញ្ជាក់ថាយើងមានចំណារ ពីសម្តេចនាយករដ្ឋមន្រី្តហ៊ុនសែន ឲ្យពិនិត្យរឿងនេះឡើងវិញ តែតុលាការហាក់មើលស្រាលមិនធ្វើតាមទេ បែរជាអនុវត្តទាំងអយុត្តិធម៌បំផុត ។
តាមការ អះអាងរបស់លោក យូ ស៊ីច័ន្ទតារដ្ឋ និងឯកសារថតចម្លងជាច្រើនដែលខ្លះចេញពីខុទ្ធកាល័យសម្តេចនាយករដ្ឋមន្រ្តី ហ៊ុន សែន ផងនោះបង្ហាញថាលោក អ៊ុង ដាំតារា បានយកប្លង់ផ្ទះវីឡារបស់លោកទៅបញ្ចាំឲ្យស្រ្តីឈ្មោះ គីង កញ្ញា យកប្រាក់២០ម៉ឺនដុល្លារ តាំងពីឆ្នាំ២០០៨ ដោយសន្យាសងការប្រាក់បួនពាន់ដុល្លាក្នុង១ខែ។ពេលលោក អ៊ុង ដាំតារា មិនបានបង់ការប្រាក់តាមការកំណត់ ស្រ្តីឈ្មោះ គីង កញ្ញា ក៏បានប្តឹងមកសាលាដំបូងរាជធានីភ្នំពេញ ហើយតុលាការនេះ និងសាលាឧទ្ធរណ៍បានសម្រេចឲ្យលោក អ៊ុង ដាំតារា ត្រូវយកប្រាក់ចំនួនម្ភៃបួនម៉ឺនប្រាំពាន់ដុល្លាទៅតម្កល់នៅសាលាឧទ្ធរណ៍ ដើម្បីទទួលបានប្លង់ផ្ទះវីឡាវិញ។
កាលពីខែឧសភា ឆ្នាំ២០១៣នេះឯឧត្តមអង្គវង្សវឌ្ឍានា រដ្ឋមន្រ្តី្រសួង យុត្តិធម៌បានផ្ញើលិខិតជូនសម្តេចនាយករដ្ឋមន្រ្តីហ៊ុន សែន ដោយបញ្ជាក់ថា គឺឈ្មោះគីង កញ្ញា មិនបានមកទទួលយកប្រាក់នោះទេ ហើយក៏មិនបានឲ្យប្លង់ផ្ទះទៅលោកអ៊ុង ដាំតារា វិញដែរ។
ដែលបញ្ហានេះត្រូវបានប្រភពមន្ត្រីបានអះអាងថា គឺភាគីដើមបណ្តឹងនិងកញ្ញា សុខ រ៉ាថន និង ផាន់ ដាវី មានចេតនាយកប្លង់ដី ទៅជាបញ្ចាំលក់រួចជាស្រេចជាមុនទៅហើយ ទើបយកលេសធ្វើជាដាក់ពាក្យបណ្តឹងតាមក្រោយក្នុងករណីរំលោភ ប្លន់ពីជនរងគ្រោះ ក្នុងលក្ខណៈជំពាក់បំណុលនោះ ។
ដូចជាអ្វីដែលគួរឲ្យភ្ញាក់ផ្អើលខ្លាំងណាស់ ក្នុងអំឡុងពេលកំពុងប្តឹងជនរងគ្រោះនោះ បែរជាធ្លាយរឿងឈ្មោះ ប៉ែន សោភ័ណ ប្តឹងដើមចោទ សុខ រ៉ាថន និងភរិយា និងបក្ខពួក និងកញ្ញាពីបទយកភូមិគ្រិះដីឡូត៍ ប្លង់ផ្ទះ មិនមែនជាកម្មសិទ្ធិរបស់ខ្លួនទៅក្លែងបន្លំលក់ទៅវិញ ។
យោងតាមពាក្យបណ្តឹងរបស់ឈ្មោះម៉ែន សោភ័ណក្នុងតម្លៃ២លានដុល្លារ។នៅពេលដឹងថាលោកសុខ រ៉ាថន មិនមែនជាម្ចាស់ស្របច្បាប់នោះឈ្មោះម៉ែន សោភ័ណ បានប្តឹងលោក សុខ រ៉ាថន និងភរិយា ពីបទឆបោក។ លោកលូង សុខា បានឲ្យដឹងថា ក្រោយមកស្រាប់តែលោកសុខ រ៉ាថន ដាក់ពាក្យប្តឹងទៅសាលារាជធានីភ្នំពេញថា លោកអ៊ុង ដាំតារា បានជំពាក់ប្រាក់ គាត់ចំនួន២លានដុល្លារ ថ្លៃប្រេងដោយគ្មានភ័ស្តុតាងអ្វី ច្បាស់លាស់ ។ មិនតែប៉ុណ្ណោះ តុលាការក៏បានសម្រេចឲ្យលោកសុខ រ៉ាថន ឈ្នះក្តីហើយបានចេញដីកាបង្គាប់ឲ្យស្រាវជ្រាវអំពីស្ថានភាពវីឡានោះដើម្បីធ្វើការរឹបអូស។ លោកលូង សុខា និយាយថា រឿងនេះអយុត្តិធម៌ណាស់ ដោយសារគេមានបក្ខពួកនិយម។ក្តីនេះចាញ់ដោយសារ មេធាវីម្នាក់ ទៀតបានក្បត់កូនក្តី។ពេលខ្ញុំដឹងសំណុំរឿងនេះចូលជាស្ថាពរទៅហើយ ដែលបញ្ហានេះ គួរតែស្ថាប័នតុលាការកំពូលរបស់ជាតិ និងរដ្ឋាភិបាលកម្ពុជាគួរតែពិនិត្យពីភាពមិនប្រក្រតីចំពោះបុគ្គលមន្ត្រី តុលាការ ព្រមទាំងមេធាវី ដែលធ្វើអាជីវកម្មរបៀបសេះហោះ មិនប្រក្រតីផង ព្រោះថាមានមន្រ្តីតុលាការមួយចំនួនកំពង់បៀមឈាមប្រជាពលរដ្ឋស្លូតត្រង់ ៕
