បន្ទាយមានជ័យ ៖ នៅល្ងាចថ្ងៃទី ១០ ខែសីហា ឆ្នាំ២០១៥នៅសាលប្រជុំ សាលាខេត្តបន្ទាយមានជ័យ លោកប្រាក់ ប៉ូលីត្រូវបានមហាផ្ទៃប្រកាសចូលកាន់តំណែងជាប្រធានបន្ទីររៀបចំដែនដីនគរូបនីយកម្មសំណង់ និងសុរិយោដីខេត្តបន្ទាយមានជ័យចាប់ពីថ្ងៃប្រកាសនេះតទៅ ។ ពិធីប្រកាសមុខតំណែង ជាប្រធានមន្ទីរនេះមានការចូលរួម លោកឆាន់ សាផានរដ្ឋលេខាធិការ ក្រសួងរៀបចំដែនដី នគរូបនីយកម្មនិងសំណង់ លោកគោស៊ុំ សារឿត អភិបាលខេត្ត បន្ទាយមានជ័យ លោកអ៊ុង អឿនប្រធានក្រុមប្រឹក្សាខេត្តបន្ទាយមានជ័យ និងមន្ត្រីមកពីគ្រប់មន្ទីរអង្គភាពជិត ១០០០នាក់ បានចូលរួមក្នុងពិធីនេះផងដែរ។
លោក អឿ សុភ័ណ អនុប្រធានមន្ទីររៀបចំដែនដី នគរូបនីយកម្ម បានឡើងប្រកាសលេខ ១ ៦២ ប្រ ក ប ស្តីពីប្រកាសតែងតាំង លោកប្រាក់ ប៉ូលី មុខងារជាប្រធានភូមិបាលក្រុងប៉ោយប៉ែត ឡើងទៅកាន់ជាប្រធាន រៀបចំដែនដីនគរូបនីយកម្ម និងសំណង់និងសុរិយោដី ខេត្តបន្ទាយមានជ័យ ចាប់ពីថ្ងៃប្រកាសនេះតទៅ។
លោកគោស៊ុំ សារឿតបានមានប្រសាសន៍ថា ដោយសារលោក លី សារីត្រូវបានប្រមុខរាជរដ្ឋាភិបាល ប្រគល់ភារកិច្ចថ្មីទៅជាអភិបាលរងខេត្តបន្ទាយមានជ័យ ពេលនេះប្រកាសលោក ប្រាក់ ប៉ូលី ជាប្រធានស្តីទីរបស់មន្ទីរសុរិយោដីនិងសំណង់។ លោកក៏បាន បន្តថា សុំឲ្យប្រធានស្តីទីថ្មីយកចិត្តទុកដាក់ ចំពោះប្រជាពលរដ្ឋ និងអាជ្ញាធរមូលដ្ឋានមិនយល់ដឹងអំពីនីតិវិធី សុំលិខិតអនុញ្ញាត ក្នុងការឲ្យ សាងសង់សំណង់មានលក្ខណៈជាអនាធិបតេយ្យ ។ ព្រោះការផ្សព្វផ្សាយច្បាប់ភូមិបាលក្រមរដ្ឋប្បវេណីក្រមព្រហ្មទ័ណ្ឌ និងអនុក្រឹត្យលេខ ស្តីពីលិខិតអនុញ្ញាតសាងសង់នៅមានកំណត់។ លោកបានមានប្រសាសន៍បន្តទៀតថា អាជ្ញាធរដែនដីមួយចំនួនមិនបានណែនាំដល់ ប្រជាពលរដ្ឋឲ្យធ្វើការសុំលិខិតអនុញ្ញាត តាមគម្រោងច្បាប់ទេបែរជាផ្តល់លិខិតអនុញ្ញាតត្រឹមសមត្ថកិច្ចខ្លួន ដែលផ្ទុយពីអនុក្រឹត្យលេខ ៨៦ស្តីពីការអនុញ្ញាតសាងសង់ទៅវិញ។
លោក ប្រាក់ បូលី បាននិយាយថា ដើម្បីតបស្នងចំពោះរាជរដ្ឋាភិបាលដែលបានផ្តល់សេចក្តីទុកចិត្ត បានប្រគល់ភារកិច្ចជូនដល់លោកគាត់បានធ្វើការប្តេជ្ញាចិត្តថា គោរពរដ្ឋធម្មនុញ្ញនៃព្រះរាជាណាចក្រកម្ពុជាខិតខំអនុវត្តគោលនយោបាយរបស់ក្រសួង និងខិតខំបំរើការងារឲ្យអស់ពីកម្លាំងកាយចិត្ត ជាមួយអាជ្ញាធរដែនដីគ្រប់លំដាប់ថ្នាក់និងគ្រប់អង្គភាពជំនាញពាក់ព័ន្ធជុំវិញខេត្ត ពង្រឹងសាមគ្គីផ្ទៃក្នុងជាមួយនិងមន្ត្រីក្រោមឱវាទ របស់មន្ទីរឲ្យបានជិតស្និទ្ធនិងខិតខំអនុវត្តសម្រេចនូវភារកិច្ច ដោយមនសិការវិជ្ជាជីវៈខ្ពស់។
លោក ឆាន់ សាផាន បានមានប្រសាសន៍ ដាស់តឿនដល់លោកប្រាក់ ប៉ូលីដែលទើបតែងតាំងជាប្រធានមន្ទីរថ្មី ត្រូវបន្តជំរុញការងាររៀបចំប្លង់គោលទីប្រជុំជន ការរៀបចំផែនការប្រើប្រាស់ដីធ្លីទាំងទីប្រជុំជននិងនៅតាមជនបទ ការគ្រប់គ្រងសំណង់ការងារ ចុះបញ្ជីដីធ្លីនិងការដោះស្រាយទំនាស់ដីធ្លីផ្សេងៗ ឲ្យបានចប់សព្វគ្រប់ចៀសវាងមានទំនាស់បន្តរបស់ប្រជាជន ៕
