ដោយ ៖ ជាតិ
នៅក្នុងសេចក្តីសម្រេចរបស់សាលារាជធានីភ្នំពេញ លេខ ១៤៦ លសរកប ចុះថ្ងៃទី២៤ ខែមេសា ឆ្នាំ២០១៣ ដាក់កម្មវត្ថុ សម្រេច លើការបើកផ្លូវ កាត់ពុះដីវីហារឥស្លាមបឹងកក់ ដោយយោងលើ លិខិតលេខ ០០១/១៣ គសជគវ ចុះ ថ្ងៃទី ៨ ខែកុម្ភៈ ឆ្នាំ ២០១៣ របស់គណៈកម្មការសម្របសម្រួលទទួលថវិកា ជំនួយរបស់រដ្ឋាភិ បល គុយវ៉ែត សម្រាប់អភិ វឌ្ឍន៍មជ្ឈមណ្ឌលឥស្លាមកម្ពុជា និង សាលារៀន ។
តាមការបញ្ជាក់ឱ្យដឹងពីលោក យ៉ា ណាសៀត ប្រធានអង្គការ ជួយជនក្រីក្រ ចាស់ជរា ក្មេងកំព្រា ជនពិការឥស្លាមកម្ពុជា បាន ធ្វើការអះអាងថា គណៈកម្មការសម្របសម្រួលទទួលថវិកា ជំនួយរបស់រដ្ឋាភិបាលគុយវ៉ែត គឺក្នុងទិសដៅអភិវឌ្ឍន៍ មិនអាចធ្វើការសម្រេចចិត្តពុះដីព្រះវិហារ ក្នុងហេតុផលបើកផ្លូវឱ្យការអភិវឌ្ឍន៍របស់ក្រុមហ៊ុនស៊ូកាគូអ៊ីនបាននោះឡើយ ។ ម៉្យាងវិញទៀត ប្លង់ដីព្រះវិហារឥស្លាមអន្តរជាតិបឹងកក់ជាជំនួយទឹកប្រាក់ ៥ លានដុល្លារ អាមេរិករបស់ រដ្ឋាភិបាល គុយវ៉ែត មិនអាចបែងចែកឱ្យក្រុមហ៊ុនស៊ូកាគូអ៊ីនបាននោះឡើយ ប្រសិនបើមានការអនុវត្តតាមការម្រេច របស់សាលារាជធានីភ្នំពេញ មែននោះ លោក យ៉ា ណាសៀត អះអាងថា នឹងមានបាតុកម្មប្រឆាំងទៅនឹងការអនុវត្ត ។
តាមការបញ្ជាក់ឱ្យដឹងពីលោក យ៉ា ណាសៀត អ្នកដែលទទួលបានផលប្រយោជន៍ពីក្រុមហ៊ុន ស៊ូកាគូអ៊ីន គឺលោក ឧស្ម័ន ហាសាន់ ព្រោះគណៈកម្មការពុំមានសិទ្ធិសម្របសម្រួលក្នុងការពុះដីព្រះវិហារ ដែលជាទីសក្ការៈរបស់សាសនិក ឥស្លាមបាននោះឡើយ ។
លោក ស៊ិត អ៊ីប្រាហ៊ីម អតីតតំណាងរាស្ត្រក៏បានសម្តែងនូវការភ្ញាក់ផ្អើលផងដែរថា សាសនិកឥស្លាមទាំងអស់មិន គាំទ្រដល់ការពុះដីព្រះវិហារឥស្លាមបឹងកក់ ធ្វើផ្លូវសម្រាប់បម្រើឱ្យផលប្រយោជន៍ក្រុមហ៊ុន ស៊ូកាគូអ៊ីននោះឡើយ ។ ម៉្យាងវិញទៀត ការប្រើឈ្មោះគណៈកម្មាការទទួលជំនួយរបស់រដ្ឋាភិបាលគុយវ៉ែត គឺមានសទ្ធិត្រឹមអភិវឌ្ឍន៍បន្ថែមនៅក្នុង បរិវេណដីព្រះវិហារតែប៉ុណ្ណោះ ពុំអាចមានសិទ្ធិឱ្យលើសពីនេះបាននោះឡើយ ។ ដូច្នេះការប្រើឈ្មោះគណៈកម្មការ គឺជាចេតនាបុគ្គលមានអំណាចដែលក្បត់ទៅនឹងបុព្វហេតុពិតប្រាកដរបស់សាសនិក ឥស្លាមតែប៉ុណ្ណោះ៕
