ខេត្តរតនគិរីៈ រថយន្តម៉ាក លុច្សស៊ីស ពាក់ស្លាកលេខ ភ្នំពេញ2G-9654 របស់ឈ្មួញ ដឹកឈើ យ៉ាងសកម្មម្នាក់ ដែលគេ ស្គាល់ថា ឈ្មោះ ចែរ៉ា ជាប្រពន្ធរបស់ លោក នាង ក្វាយ មេបញ្ជាការរង កងរាជអាវុធហត្ថ ខេត្តរតនគិរី បានលួចលាក់ ដឹកឈើប្រណិត ខុសច្បាប់ ប្រភេទឈើធ្នង់ ពេញណែនឡាន ចេញពីស្រុក វ៉ឺនសៃ ឆ្ពោះចូលមក ក្រុងបានលុង មកដល់ត្រង់ ចំណុចស្ពានឈើ ជិតស្រុកអូរជុំ ត្រូវបាន សមត្ថកិច្ច នគរបាល ប្រឆាំងបទល្មើស សេដ្ឋកិច្ច ខេត្តរតនគិរី ស្ទាក់ចាប់ និងបង្ក្រាបបាន ត្រង់ចំណុច គល់ស្ពានឈើ នេះតែម្តង ។
បើតាមសេចក្តី រាយការណ៍ ពីនគរបាល ប្រឆាំងបទល្មើស សេដ្ឋកិច្ច ខេត្តរតនគិរី លោក នូវ ដារ៉ា នាយការិយាល័យ ដែលបាន ដឹកនាំកម្លាំង ចុះស្ទាក់ចាប់ ឡានរបស់ ប្រពន្ធលោក មេបញ្ជាការរង កងរាជ អាវុធហត្ថខេត្ត បានឲ្យដឹងថា លោកបាន ទទួលព័ត៌មានថា មានរថយន្ត ម៉ាកលុច្សស៊ីស របស់ ចែរ៉ា ខាងលើនេះ តែងតែលួចលាក់ ធ្វើចរាចរណ៍ ដឹកឈើប្រណិត ខុស ច្បាប់ ផ្លូវវ៉ឺនសៃនេះ យ៉ាងសកម្ម មិនកោតក្រែង ញញើត និងជំនាញ ឬ សមត្ថកិច្ច តាមដងផ្លូវឡើយ ហើយព័ត៌មាននេះ លោក ទទួលបាន តាំងពីថ្ងៃទី ០៩ ខែធ្នូ មកម្លេះ ហើយលោក បានដឹកនាំ កម្លាំងទៅពួន ស្ទាក់អស់ រយៈពេល ១យប់១ថ្ងៃ មកហើយ រហូតដល់ម៉ោង ៥និង១៥នាទី ព្រលឹមស្រាងៗ ថ្ងៃទី១០ ខែធ្នូ ឆ្នាំ២០១៤ ទើបឃើញ ភិនភាគរថយន្ត លុច្សស៊ីស ពាក់ស្លាកលេខ ភ្នំពេញ2G-9654 បានបើក ក្នុងល្បឿន យ៉ាងលឿន ក្នុងគោលបំណង គេចវេស ពីការត្រួតពិនិត្យ របស់សមត្ថកិច្ច ។ ប៉ុន្តែ ដោយសារតែ កម្លាំងរបស់ លោកបាន ត្រៀមលក្ខណៈ ជាមុន ទើបរថយន្ត មិនអាចគេចរួច ត្រូវបាន កម្លាំងនគរបាល ប្រឆាំង បទល្មើស សេដ្ឋកិច្ចខេត្ត ចាប់បាននៅ គល់ស្ពានឈើ ក្បែរស្រុក អូរជុំ នោះតែម្តង ។
ក្រោយពីធ្វើ ការត្រួតពិនិត្យ ឃើញរថយន្តនេះ បានផ្ទុកទៅដោយ ឈើប្រណិត ខុសច្បាប់ ទើបលោក បានរាយការណ៍ ទៅឲ្យលោក ស្នងការ និងលោក ព្រះរាជអាជ្ញា ដោយបាន បញ្ជាឲ្យ នាំយករថយន្ត មកស្នងការ នគរបាលខេត្ត ធ្វើកំណត់ហេតុ បញ្ជូនទៅឲ្យ ជំនាញរដ្ឋបាល ព្រៃឈើ ចាត់ការបន្ត ចំណែកម្ចាស់ រថយន្ត និងម្ចាស់ឈើ លោកបាន បញ្ជាក់ថា សមត្ថកិច្ចស្គាល់ អត្តសញ្ញាណ យ៉ាងច្បាស់ ហើយអ្វីដែល គួរឲ្យមានការ ភ្ញាក់ផ្អើលនោះ នៅពេល សមត្ថកិច្ចធ្វើ ការឃាត់ រថយន្ត នោះភ្លាម ចែរ៉ា ដែលជាប្រពន្ធ មេបញ្ជាការរង កងរាជ អាវុធហត្ថខេត្ត មិនដឹងជា អាងអ្វីទេ បានចុះពីឡាន ស្រែកឡាំប៉ា ដាក់សមត្ថកិច្ច ព្រមទាំង បម្រុងចាក់សាំង ដុតរថយន្ត និងមិនតែប៉ុណ្ណោះ បានស្រែកថា ធ្លាប់បានបង់ លុយឲ្យ សមត្ថកិច្ចទៀត ខណៈពេល ដែលកំពុង ប្រទាញប្រទងគ្នា ក៏ស្រាប់តែ លេចមុខលោក នាង ក្វាយ ជាមេបញ្ជាការ រងអាវុធហត្ថខេត្ត ជិះឡានទំនើប ម៉ាកធុនត្រា ពាក់ស្លាកលេខ ខេមរៈភូមិន្ទ បានទៅដឹក រំដោះប្រពន្ធ ឈ្មោះ ចែរ៉ា ចេញពី សមត្ថកិច្ច នៅកន្លែង កើតហេតុនោះបាត់ ។
ទាក់ទិនទៅនឹង ករណីបង់លុយ ឲ្យសមត្ថកិច្ច លោក នូវ ដារ៉ា នាយការិយាល័យ នគរបាល ប្រឆាំង បទល្មើស សេដ្ឋកិច្ច ខេត្តរតនគិរី ដែលដឹកនាំ កម្លាំងចុះ បង្ក្រាបនេះ បានឆ្លើយ បដិសេធយ៉ាង ដាច់អហង្ការថា លោកមិនដែល បានទទួល លុយពី ចែរ៉ា នោះឡើយ ៕
ដោយៈ តាំង ឧសារ
