ខេត្តរតនគិរី ៖ ដោយមានការណែនាំនិងចង្អុលបង្ហាពីអគ្គនាយកដ្ឋានអន្តោប្រវេសន៍ ក៏ដូចជាលោកឧត្តមសនីយ៍ត្រីស្នងការខេត្តរតនគិរី កម្លាំងជំនាញការិយាល័យនគរបាលអន្តោប្រវេសន៍នៃស្នងការនគរបាលខេត្តរតនគិរី ដែលដឹកនាំដោយលោកវរៈសេនីយ៍ឯក ជា ប៊ុនធឿន ស្នងការរងទទួលបន្ទុកអន្តោប្រវេសន៍បានធ្វើការស្រាវជ្រាវរកឃើញជនបរទេសដែលជាជនជាតិវៀតណាមមកស្នាក់នៅដោយខុសច្បាប់ក្នុងខេត្តរតនគិរី បានចំនួន១៤លើករួចហើយ ដោយគិតពីខែសីហា ដល់ខែវិច្ឆិការ ឆ្នាំ២០១៤នេះ ដែលមានចំនួនមនុស្សស្មើនិង៤៧នាក់ ស្រី១០នាក់ ប្រុស៣៧នាក់ ហើយជាក់ស្តែងនៅថ្ងៃទី២៦ ខែវិច្ឆិការ ឆ្នាំ២០១៤នេះផងដែរ កម្លាំងជំនាញរបស់ការិយាល័យអន្តោប្រវេសន៍នៃស្នងការដ្ឋាននគរបាលខេត្តរតនគិរី ដែលដឹកនាំដោយលោកជា ប៊ុនធឿន បានធ្វើការស្រាវជ្រាវរកឃើញជនបទរលទេសដែលជាជនជាតិវៀតណាមចំនួន៩នាក់ ស្រី៣នាក់ ប្រុស៦នាក់ ដែលមកស្នាកនៅខុសច្បាប់រកស៊ី រឺធ្វើជាកម្មករ ហើយបានចាប់បញ្ជូនជនជាតិវៀតណាមដែលមកស្នាក់នៅខុសច្បាប់ទាំងអស់នោះអោយទៅប្រទេសកំណើតរបស់ខ្លួនវិញនៅរសៀលថ្ងៃទី២៦ ខែវិច្ឆិកា ឆ្នាំ២០១៤ នេះផងដែរ។
បើតាមការផ្តល់ពត៌មានអោយដឹងពីលោកវរសេនីយ៍ឯក ជា ប៊ុនធឿន ស្នងការរងទទួលផ្នែកអន្តោប្រវេសន៍បានអោយដឹងថា ជនបរទេសទាំងអស់នេះភាគច្រើនពួកគេបានលួចចូលមកតាមច្រកត្រពាំងផ្លុង ខេត្តត្បូងឃ្មុំ រួមនិងច្រករបៀងផ្សេងៗទៀត ដែលចូលមកស្នាក់នៅដោយខុសច្បាប់មកប្រកបរបររកស៊ីរឺធ្វើជាកម្មករ ជាង និងសិម្បកម្ម ។ល។
លោកបានបន្ថែមអោយដឹងទៀតថា ដើម្បីចូលអនុវត្តន៍អោយបានម៉ឺងម៉ាត់ទៅតាមបញ្ជារបស់អគ្គនាយកដ្ឋានអន្តោប្រវេសន៍ ក្នុងការរឹតបន្តឹងទប់ស្កាត់ការលំហូរចូលនៃជនបរទេសដែលចូលមកស្នាក់នៅដោយខុសច្បាប់ សមត្ថកិច្ចដែលនៅតាមបណ្តាលច្រកអន្តរជាតិ ដូចជាច្រករបៀងត្រូវតែពិនិត្យ និងរឹតបន្តឹង ព្រមទាំងចូលរួមសហការណ៍ជាមួយជំនាញអន្តោប្រវេសន៍ដើម្បីយើងទទួលបានលទ្ធផលជោគជ័យ៕
តាំង ឧសារ
