ដោយ ៖ ដារី
ឈើប្រណីតដឹកមកពីស្រុកកោះញែក ខេត្តមណ្ឌលគីរី តាមរទេះគោទាំងខ្សែៗយកមកស្តុកទុកនៅភូមិថ្មី ឃុំថ្មី ស្រុកចិត្របុរី ខេត្តក្រចេះ ត្រូវបានមេឈ្មួញ ៤នាក់ ប្រើរថយន្តប្រភេទទំនើបដឹកចេញយកទៅលក់ឱ្យលោក ឆុង នៅភូមិក្តុរ ស្រុកមេមត់ជាសមត្ថកិច្ចកាងយកទៅលក់បន្តនៅវៀតណាម ។ មេឈ្មួញដឹកលក់ឱ្យមន្ត្រីសមត្ថកិច្ចកាងឈើយកទៅលក់ដល់ វៀតណាមមានឈ្មោះ ១-មេឈ្មួញឈ្មោះ ធុង, ២-ឈ្មោះ ថា, ៣-មេឈ្មួញឈ្មោះ លី និង៤-មេឈ្មួញឈ្មោះ ពក ។
ប្រភេទដែលមេឈ្មួញទាំង ៤នាក់ ប្រើជាមធ្យោបាយដឹកជញ្ជូនរួមមានកាំរីឆ្លាម, កាំរីបាឡែន ដោយក្នុងមេឈ្មួញម្នាក់ ៗមានរថយន្តទំនើបចាប់ពី ៤គ្រឿង ទៅ ៦គ្រឿង ដោយក្នុងមួយថ្ងៃអាចដឹកជញ្ជូនដល់ទៅ ៥ជើង ឯណោះ ។ ម្យ៉ាងវិញទៀត ប្រភេទឡានទំនើបរបស់មេឈ្មួញដឹកឈើប្រណីតលោតឆ័ត្រទាំង ៤ អត់មានផ្លាកលេខទេ ដូចឃើញក្នុងរូប ភាពនេះ ស្រាប់រថយន្តកាំមរីបាឡែន របស់មេឧក្រិដ្ឋជនឈើឈ្មោះ ពក ដែលល្បីថា បើកផ្តាច់ព្រលឹងថែមទៀតផង ។
មានការបញ្ជាក់ឱ្យដឹងថា រថយន្តទំនើបដឹកឈើដែលមេឈ្មួញទាំង ៤ នាក់ មិនប្រើផ្លាកលេខ គឺជាសញ្ញាបញ្ជាក់ឱ្យ សមត្ថកិច្ចស្គាល់ថា ជាឡានដឹកឈើរបស់មេឈ្មួញឈើទាំង ៤នាក់ ព្រោះបើគ្មានការឃុបឃិតពីសមត្ថកិច្ចមេខណ្ឌនាយផ្នែក រហូតដល់នាយសង្កាត់ និងកម្លាំងសមត្ថកិច្ចគ្រប់ប្រភេទទេនោះ គឺរថយន្តមេឈ្មួញទាំង ៤ ពិតជាមិនអាចគេចចេញត្រឹមកម្លាំង នគរបាលចរាចរបានផង កុំថាឡើយកម្លាំងកងរាជអាវុធហត្ថ ឬមេព្រៃខេត្តក្រចេះនោះ ។
ចំពោះមន្ត្រីសមត្ថកិច្ចឈ្មោះ ឆុង ដែលចាំទទួលទិញឈើប្រណីតពីមេឈ្មួញដឹកឈើប្រចាំនៅទីតាំងភូមិក្តុរ គឺបានប្រើ កម្លាំងយាមកាមយ៉ាងតឹងរ៉ឹងអត់មានអ្នកកាសែតណាហ៊ានចូលទៅថតបាននោះឡើយ ព្រោះនៅតាមផ្លូវចូលក្នុងចំការកៅស៊ូ ឆ្ពោះទៅកាន់ភូមិក្តុរ គឺពិតជាមិនធម្មតាឡើយ អាចមានខ្នងនៅពីក្រោយលោក ឆុង ក៏មិនតូចនោះដែរ ទើបអាចកាងឈើ យកទៅលក់នៅវៀតណាម ដោយសេរី បានដោយគ្មានការត្រួតពិនិត្យពីកម្លាំងគយប្រចាំច្រកព្រំដែនឡើយ ។
ពាក់ព័ន្ធទៅនឹងការដឹកជញ្ជូនឈើប្រណីតរបស់មេឈ្មួញទាំង ៤នាក់ ដូចរៀបរាប់ខាងលើត្រូវបានមជ្ឈដ្ឋានមន្ត្រីក្នុង ខេត្តក្រចេះបញ្ជាក់ឱ្យដឹងថា មេខ្លោងធំដែលកាងឱ្យមេឈ្មួញទាំង ៤នាក់ គឺមានឈ្មោះឧកញ៉ា លឹម ប៊ុណ្ណា ។ ហើយ លឹម ប៊ុណ្ណា បច្ចុប្បន្នគឺបានកាងឈើប្រណីតនៅស្ទឹងត្រែង និងខេត្តមណ្ឌលគីរី ដោយប្រើកម្លាំងប្រជាពលរដ្ឋចូលព្រៃកាប់ឈើលក់ ឱ្យខ្លួនថែមទៀតផង ៕
