តាំងពីឆ្នាំ២០០៩ លោក ចាន់ សាវឿន ស្នងការរងនគរបាលខេត្តកណ្តាល បានសម្រេចពុះដីឡូត៍មួយកន្លែងនៅជាប់ របងវិទ្យាល័យតាខ្មៅលក់ក្នុងទំហំ ៤ម៉ែត្រ គុណ ១៥ម៉ែត្រ ដោយសម្រេចបើកផ្លូវក្បែររបងវិទ្យាល័យតាខ្មៅ ឱ្យប្រជាពលរដ្ឋដែលទិញដីធ្វើផ្ទះ បានធ្វើដំណើរចេញចូលតាមផ្លូវជាតិលេខ ២១A ។ មានប្រជាពលរដ្ឋជាច្រើនបានទិញដីឡូត៍ទំហំ ៤ម៉ែត្រ គុណ ១៥ម៉ែត្រ ដោយសម្អាងថា ម្ចាស់ដីបានបើកផ្លូវទំហំ ៥ម៉ែត្រ ឱ្យចេញចូលដោយកំណត់ក្នុងកិច្ចសន្យា និងក្នុងលិខិតផ្ទេរសិទ្ធិថា ជាផ្លូវលំ ដោយមានអាជ្ញាធរភូមិ-ឃុំទទួលស្គាល់តាមផ្លូវច្បាប់ថែមទៀតផង ។
ចំណែកដីនៅខាងមុខជាប់ថ្នល់ជាតិ ក្នុងភូមិព្រែកសំរោង សង្កាត់តាខ្មៅ ក្រុងតាខ្មៅ ដែលស្ថិតនៅពីមុខដីឡូត៍ ដែលលោក ចាន់ សាវឿន បានពុះលក់ត្រូវបានឈ្មោះ ច្រាយ ជ្រឿន ទិញពីឈ្មោះ ចាន់ សាវឿន ក្នុងទំហំក្បាលដី ៧ម៉ែត្រ និងបណ្តោយ ៣០ម៉ែត្រហើយបញ្ជាក់ព្រំដីជាប់នឹងផ្លូវលំផងដែរ ។ ដោយចង់បង្កើតមុខរបរបន្ថែម ក្នុងការបើកការ៉ាស់ឈ្មោះ ច្រាយ ជ្រឿន បានទិញបន្តពីអ្នកទិញដីឡូត៍មុនរហូត លោក ច្រាយ ជ្រឿន មានបណ្តោយដល់ទៅ ៦០ម៉ែត្រ ។ នៅពេលលោក ច្រាយ ជ្រឿន ប្រកបរបរសុខៗក៏ស្រាប់តែ លោក ចាន់ សាវឿន ធ្វើរបងចាក់បេតុងតាមផ្លូវលំដែលចូលទៅកាន់ផ្ទះសំណាក់គាត់នៅខាងក្នុងទៅវិញរហូតចូលដីចិញ្ចើម ផ្លូវដល់ទៅ ៤ម៉ែត្រឯណោះ ។
ករណីសង់របងរំលោភលើកិច្ចសន្យាពីលោក ចាន់ សាវឿន ស្នងការរងនគរបាលខេត្តកណ្តាល ត្រូវបានលោក ច្រាយ ជ្រឿន ដាក់ពាក្យបណ្តឹងទៅសាលាសង្កាត់តាខ្មៅ និងសាលាក្រុងតាខ្មៅឱ្យជួយដោះស្រាយ ប៉ុន្តែជាច្រើនខែមកហើយ ចៅសង្កាត់ និងអភិបាលក្រុងបានត្រឹមហៅភាគីទាំងសង្ខាងទៅសួរនាំដោយពុំមានវិធានការដោះស្រាយតាមផ្លូវច្បាប់អ្វីនោះ ឡើយ ។ មានការអះអាងពីក្រុមអ្នកច្បាប់បានបញ្ជាក់ឱ្យដឹងថា បើផ្លូវចូលផ្ទះសំណាក់របស់លោក ចាន់ សាវឿន គឺអាចចាក់ របងបេតុងកម្ពស់ណាក៏បានដែរ ប៉ុន្តែបើស្ថិតនៅក្នុងផ្លូវលំដែលទទួលស្គាល់ដោយអាជ្ញាធរដែនដីហើយ គឺលោក ចាន់ សាវឿន ពិតជាមិនអាចសាងសង់របងបេតុងចេញពីផ្លូវជាតិចូលដល់ផ្ទះសំណាក់គាត់បាននោះឡើយ ។ ម្យ៉ាងវិញទៀតផ្លូវលំទំហំ ទទឹង ៥ម៉ែត្រ គឺភាគីលោក ចាន់ សាវឿន ជាអ្នកកំណត់ដើម្បីធានាដល់អ្នកទិញដីដែលគាត់ពុះលក់អាចមានផ្លូវចេញចូលបាន ។ មិនតែប៉ុណ្ណោះលោក ចាន់ សាវឿន បានបំពានរហូតសង់របងចូលដីចិញ្ចើមផ្លូវដល់ទៅ ៤ម៉ែត្រថែមទៀត ដែលជាហេតុធ្វើឱ្យ ជនរងគ្រោះចាត់ទុកថា ជាករណីដែលលោក ចាន់ សាវឿន បានប្រើអំណាចរំលោភច្បាប់តែម្តង ។
ជុំវិញទំនាស់ខាងលើនេះ មន្ត្រីសុរិយោដីខេត្តកណ្តាលបានបញ្ជាក់ឱ្យដឹងថា ដើម្បីធានាឱ្យមានការដោះស្រាយលើក លែងតែប្រជាពលរដ្ឋប្តឹងមកមន្ទីរជំនាញរបស់លោកដោយផ្ទាល់ ឬក៏ប្តឹងទៅសាលាខេត្តតែម្តង ទើបលោកអាចចាត់មន្ត្រី ជំនាញទៅពិនិត្យស្វែងរកដំណោះស្រាយបាន ។ ព្រោះមានការសាងសង់រំលោភច្រើនករណីណាស់ ដែលមន្ទីរជំនាញមិនបាន ដឹង ប្រសិនបើជនរងគ្រោះនៅតែបន្តប្តឹងខុសកន្លែងដែលត្រូវដោះស្រាយពិតប្រាកដ ៕
