បន្ទាប់ពីតំបន់ព្រៃនៅអូរសោម ក្នុងស្រុកវាលវែងជាប់ខេត្តកោះកុង ត្រូវបានក្រុមហ៊ុនទ្រីភាពកាប់បំផ្លាញអស់គ្មាន សល់ រហូតមកដល់ពេលនេះ ក្រុមហ៊ុន MDS របស់ឧកញ៉ាទ្រីភាពបានបន្តប្រើកម្លាំងចុះមកចំណុចពងពុង ក្នុងឃុំប្រម៉ោយ ស្រុកវាលវែង ដើម្បីកាប់បំផ្លាញព្រៃអភិរក្ស ស្ថិតក្រោមអំណាចមេការឈ្មោះ ម៉ៅ ចន្នី ។ ឈើប្រណីតដែលដឹកយកមកគរ ទុកនៅចំណុចពងពុង ក្បែរសង្កាត់រដ្ឋបាលព្រៃឈើវាលវែង ដែលមានលោក ជា ហួត ជានាយសង្កាត់បានការពារឈើប្រណីត ឱ្យក្រុមហ៊ុន ទ្រី ភាព ដោយទទួលបានលាភសក្ការៈពីមេការឈ្មោះ ម៉ៅ ចន្នី មិនតិចទេ ទើបសម្រេចក្បត់ទៅនឹងតួនាទីខ្លួនជា អ្នកការពារដែនព្រៃអភិរក្សនៅតាមជួរភ្នំជាប់នឹងស្រុកភ្នំក្រវាញបែបហ្នឹង ។
ដូចឃើញក្នុងរូបភាពនេះស្រាប់ ប្រភេទឈើធ្នង់ និងនាងនួន ដែលដឹកតាមរទេះយកមកស្តុកទុកនៅចំណុចពងពុង ស្ថិតនៅក្បែរសង្កាត់រដ្ឋបាលព្រៃឈើវាលវែង ក្រោមអំណាចលោក ជា ហួត បើគ្មានការឃុបឃិត តើអាចស្តុបឈើរាប់រយដុំ ដើម្បីដឹកនាំចេញទៅដាក់នៅឃ្លាំង ទ្រី ភាព នៅដំណាក់ឈើក្រំ ក្នុងស្រុកក្រវាញបានដោយរបៀបណា ? ។ ម្យ៉ាងវិញទៀតនៅចំណុចពងពុង ក្នុងឃុំប្រម៉ោយ អត់មានជាប់ពាក់ព័ន្ធទៅនឹងដីព្រៃសម្បទានសេដ្ឋកិច្ចរបស់ក្រុមហ៊ុន MDS ឧកញ៉ាទ្រីភាពឡើយ ទើបតម្រូវឱ្យលោកមេសង្កាត់រដ្ឋបាលព្រៃឈើ ជា ហួតបោះទីតាំងស្នាក់ការសង្កាត់រដ្ឋបាលព្រៃឈើ វាលវែង ដើម្បីធានាដល់ការការពារដែនព្រៃអភិរក្សរបស់រដ្ឋឱ្យនៅគង់វង្ស ។
តាមការអះអាងរបស់ប្រជាពលរដ្ឋនៅស្រុកវាលវែង បានបញ្ជាក់ឱ្យដឹងថា កុំថាឡើយកម្លាំងមេព្រៃលោក ជា ហួត សូម្បីកម្លាំងនគរបាល និងកងរាជអាវុធហត្ថក៏ត្រូវការពារ និងតាមឃ្លាំមើលប្រជាពលរដ្ឋណាដែលគេចវេស មិនព្រមយកឈើ មកលក់ឱ្យមេការក្រុមហ៊ុន ទ្រីភាព ឈ្មោះ ម៉ៅ ចន្នី ក្នុងតម្លៃថោកដែរ ។ ព្រោះបានជាមេការក្រុមហ៊ុន MDS ទិញក្នុងតម្លៃ ថោក គឺទុកការចំណាយមួយផ្នែកទៅឱ្យមេព្រៃរួមទាំងកម្លាំងសមត្ថកិច្ច និងមួយផ្នែកទៀត គឺសម្រាប់មេៗនៅខាងលើដែល បានបង្គាប់បញ្ជាឱ្យសមត្ថកិច្ចថ្នាក់ក្រោមត្រូវគោរពតាមបទបញ្ជារបស់មេការក្រុមហ៊ុន MDS ឈ្មោះ ម៉ៅ ចន្នី ដោយគ្មានការ យោគយល់ដល់ពលរដ្ឋណាម្នាក់ឡើយ ។
ចំណែកនៅឯស្រុកភ្នំក្រវាញវិញ ស្ថិតក្នុងព្រៃជួរភ្នំក្រវាញ ដែលការពារដោយព្រះរាជក្រឹត្យក៏ស្ថិតក្នុងស្ថានភាពមហន្ត រាយយ៉ាងធ្ងន់ធ្ងរដែរ ។ ព្រោះក្រោមអំណាចរបស់ក្រុមហ៊ុន MDS របស់ឧកញ៉ាទ្រីភាព បានដាក់មេការឈ្មោះ ហេង តារា ឱ្យឈូសឆាយផ្លូវចូលទៅតំបន់ជួរភ្នំក្រវាញ ហើយប្រើគោយន្តប្រភេទកែច្នៃកង់អាត្រាក់ខ្នាតធំដូចឃើញក្នុងរូបភាពនេះ ស្រាប់ចូលទៅដឹកឈើប្រណីតដោយពុំបាន គិតដល់សារៈសំខាន់ ស្ថិតក្រោមព្រះរាជកិច្ចរបស់អតីតអង្គព្រះមហាក្សត្រឡើយ ។ មិនតែប៉ុណ្ណោះ ស្ថិតក្រោមអំណាចមេការ ក្រុមហ៊ុន MDS របស់ឧកញ៉ាទ្រីភាព ឈ្មោះ ហេង តារា បានដាក់កុងត្រូលនៅចំណុចខ្សាច់ពូក ក្នុងភូមិវាលវែង ឃុំរកាត ដោយប្រើកម្លាំងនគរបាលស្រុក ទាហានស្រុក និងកងរាជអាវុធហត្ថស្រុកស្ទាក់ចាប់អ្នកដឹកឈើណាដែលមានបំណងគេចវេស មិនលក់ឱ្យក្រុមហ៊ុនថែមទៀតផង ។
ចំពោះអង្គការ CI បោះទីតាំងនៅចំណុចតាងរាង ភូមិវាល ឃុំសំរោង ដែលទទួលជំនួយហិរញ្ញប្បទានពីបរទេសដើម្បី ទប់ស្កាត់បទល្មើសព្រៃឈើដែលការពារដោយព្រះរាជក្រឹត្យ គឺបាននឹងកំពុងឃុបឃិតជាមួយមេការទ្រីភាពឈ្មោះ ហេង តារា ដើម្បីស្វែងរកផលប្រយោជន៍មួយជាន់ទៀត ទើប ធ្វើឱ្យប្រភេទឈើប្រណីតនៅជួរភ្នំក្រវាញដែលការពារដោយព្រះរាជក្រឹតត្រូវទទួលរងការវិនាសហិនហោច កាន់តែមាន វិសាលភាពធ្ងន់ធ្ងរទៅហើយ ។ បើនិយាយដល់ស្ថាប័នជំនាញនាយផ្នែករដ្ឋបាលព្រៃឈើក្រវាញ មានស្នាក់ការនៅភូមិព្រែគ ១ ឃុំសំរោង ក្រោមអំណាចលោក ថេត វិញ នោះ គឺត្រូវបានប្រជាពលរដ្ឋនៅស្រុកភ្នំក្រវាញធ្វើការអះអាងថា បានរួមចំណែកឃុបឃិតជាមួយមេការក្រុមហ៊ុន MDS យ៉ាង ពេញទំហឹងតែម្តង ។
ស្ថិតក្នុងស្ថានភាពដែលមិនអាចគ្រប់គ្រង និងការពារតំបន់ព្រៃអភិរក្សនៅតំបន់ពងពុងបាន រួមទាំងតំបន់ព្រៃនៅជួរភ្នំ ក្រវាញដែលការពារដោយព្រះរាជក្រឹតផងនោះ ត្រូវបានមជ្ឈដ្ឋានអ្នកតាមដានពីបទល្មើសព្រៃឈើចាត់ទុកឥទ្ធិពលរបស់ក្រុម ហ៊ុន MDS របស់ឧកញ៉ាទ្រីភាព បានគ្របដណ្តប់ទៅលើមន្ត្រីគ្រាក់ៗទាំងកម្លាំងសមត្ថកិច្ចរួមទាំងមន្ត្រីជំនាញគ្រប់លំដាប់ថ្នាក់ ថែមទៀតផង ។ ទោះបីជាពេលនេះ ក្រុមហ៊ុន MDS របស់ឧកញ៉ាទ្រីភាព បានសរសេរនៅក្នុងបទបញ្ជាចុះថ្ងៃទី ២៣ ខែឧសភា ឆ្នាំ២០១៣ ថា ដើម្បីរក្សាសណ្តាប់ធ្នាប់ឱ្យបានល្អព្រមទាំងទប់ស្កាត់ និងជៀសវាងរាល់បទល្មើសផ្សេងៗដែលអាច ប៉ះពាល់ដល់កិត្តិយសក្រុមហ៊ុនលោកសម្រេចចេញនូវបទបញ្ជាឱ្យនាយកគ្រប់គ្រងមណ្ឌលពោធិ៍សាត់ និងប្រធានផ្នែកអាជីវ កម្មវាលវែងត្រូវធ្វើសេចក្តីជូនដំណឹងទៅគ្រប់មេការដែលប្រកបអាជីវកម្មឈើនៅក្នុងដែនដីសម្បទានវិនិយោគអភិវឌ្ឍន៍ដំ ណាំកសិឧស្សាហកម្មដំណាំកៅស៊ូរបស់ក្រុមហ៊ុនទាំងអស់ជ្រាបថា ក្រុមហ៊ុន ទ្រី ភាព គ្រុប ធ្វើអាជីវកម្មឈើ ចំពោះអាជីវកម្ម ឈើផ្សេងៗទៀត ដែលនៅក្រៅដែនដីសម្បទានវិនិយោគអភិវឌ្ឍន៍របស់ក្រុមហ៊ុននោះ ក្រុមហ៊ុននឹងមិនអនុញ្ញាត និងមិនទទួលស្គាល់ជាដាច់ខាន ។ ត្រូវទុកជូនអាជ្ញាធរមានសមត្ថកិច្ច មានវិធានការទៅតាមផ្លូវច្បាប់ចំពោះអ្នកប្រព្រឹត្ត ។
មានការចោទសួរថា ស្ថិតក្នុងតំបន់ពងពុង ក្នុងស្រុកវាលវែង ដែលមេការ ក្រុមហ៊ុន MDS របស់ឧកញ៉ាទ្រីភាព ប្រមូលទិញ តើមានពាក់ព័ន្ធទៅនឹងដីសម្បទានរបស់ក្រុមហ៊ុន ទ្រីភាព គ្រុប មកពីណា ? ។ ឬថា ការឃុបឃិតរបស់មេការ ទ្រីភាព ជាមួយមន្ត្រីជំនាញ និងសមត្ថកិច្ចអាជ្ញាធរថ្នាក់ស្រុករហូតដល់ថ្នាក់ខេត្ត ដែលមានលោក ម៉ៅ ធនិន ជាគណៈបញ្ជា ការឯកភាពខេត្ត ស្ថិតនៅពីក្រោយបទល្មើសឈើប្រណីតទាំងអស់នេះ ដែលមានលោក ម៉ៅ ចន្នី ជាមេខ្លោង ។ ស្ថិតក្នុងតំបន់អារ៉ៃតាមជួរភ្នំក្រវាញ ដែលជាព្រៃការពារ ដោយព្រះរាជក្រឹត្យត្រូវបានមេការ ក្រុមហ៊ុន MDS របស់ឧកញ៉ាទ្រីភាព ឈ្មោះ ហេង តារា ដាក់កុងត្រូលប្រើកម្លាំងយោធា នគរបាល និងកងរាជអាវុធហត្ថឱ្យត្រួត ពិនិត្យទៅលើអ្នកកាប់ឈើណាដែលគេចចេញមិនព្រមលក់ឱ្យមេការក្រុមហ៊ុន តើជាតំបន់ដែលមានការពាក់ព័ន្ធទៅនឹង ដីក្រុមហ៊ុនទ្រីភាពគ្រុបមកពីណា ?។ ឬថាមានការឃុបឃិតរហូតដល់លោក ម៉ៅ ធនិន គណៈបញ្ជាការឯកភាពខេត្ត ពោធិ៍សាត់ ទើបមេការឈ្មោះ ហេង តារា អាចប្រើកម្លាំងសមត្ថកិច្ចគ្រប់ប្រភេទមកបំរើឱ្យផលប្រយោជន៍បទល្មើសព្រៃឈើ នៅតំបន់ជួរភ្នំក្រវាញដែលជាព្រៃការពារដោយព្រះរាជក្រឹត្យបាន ។
ព្រោះបើផ្អែកលើភស្តុតាងក្នុងរូបភាពបទល្មើសព្រៃឈើនៅស្រុកវាលវែងរួមទាំងស្រុកភ្នំក្រវាញ ប្រសិនបើគ្មានការ ឃុបឃិតពីលើដល់ក្រោមមេការឈ្មោះ ម៉ៅ ចន្នី ប្រចាំនៅស្រុកវាលវែង និងមេការឈ្មោះ ហេង តារា ប្រចាំនៅស្រុកភ្នំ ក្រវាញក៏មិនអាចមានលទ្ធភាពប្រព្រឹត្តបទល្មើសឧក្រិដ្ឋកម្មព្រៃឈើបានយ៉ាងគគ្រឹកគគ្រេងបែបហ្នឹងបានដែរ ។ ហើយរឿង ដែលចម្លែំកនោះ គឺស្នាក់ការអង្គការ CI ដែលស្ថិតនៅក្បែរនោះដែរ តើកំពុងធ្វើអ្វីឱ្យប្រាកដ ឬថាប្រាក់ជំនួយក៏យកលុយពុក រលួយក៏ទទួលដែលតម្រូវឱ្យម្ចាស់ជំនួយនៅក្រៅប្រទេសត្រូវតែទទួលស្គាល់ពីភាពអសកម្ម លើការចំណាយដើម្បីទប់ស្កាត់បទ ល្មើសព្រៃឈើនៅស្រុកភ្នំក្រវាញ ទើបអាចឈានទៅរកវិធានការថ្មីដើម្បីទប់ស្កាត់បទល្មើសព្រៃឈើឱ្យមានប្រសិទ្ធភាពពិត ប្រាកដបាន ៕
