ដោយ ៖ រ៉ាយ ភុន
ផ្អែកតាមដីកាកោះរបស់លោក ញាណ សុវណ្ណ អនុប្រធានសាលាដំបូងខេត្តពោធិ៍សាត់បង្គាប់ឱ្យភាគីដើមចោទឈ្មោះ ស្វាយ សាម៉េត ជាដើមចោទ និងចុងចម្លើយឈ្មោះ ចាន់ នួន ចូលខ្លួនមកសាលាដំបូងនៅថ្ងៃទី ១៩ ខែសីហា ឆ្នាំ២០១៤ វេលាម៉ោង ៨ព្រឹក លើបណ្តឹងសុំដីកាសម្រេចរក្សាការពារ ។
តាមពិតទៅលោក ស្វាយ សាម៉េត អត់មានឯកសារអ្វីទាំងអស់រួមទាំងសាក្សីក៏គ្មានរួចប្តឹងចោទលោក ចាន់ នួនថា បានរំលោភយកដីខ្លួនដោយមិនគោរពទៅតាមការសម្រេចរបស់អាជ្ញាធឃ្រុំទៅវិញ ។ មិនដឹងថា តុលាការខេត្តពោធិ៍សាត់ មានវត្ថុតាងសម្អាងអ្វីនោះទេ ទើបចេញដីកាកោះតាមបណ្តឹងលោក ស្វាយ សាម៉េត ព្រោះថា បើលោក ចាន់ នួន រំលោភយកដីខ្លួនដោយមិនគោរពតាមការបង្គាប់បញ្ជាពីមេឃុំ ហេតុអ្វីក៏លោក ចាន់ នួន ទទួលបានសលាកបត្រព័ត៌មានក្នុង ការចុះវាស់វែងពីក្រុមនិស្សិតដោយមានការចុះហត្ថលេខាទទួលស្គាល់ពីលោកមេឃុំថ្មដាផងនោះ ។
ម្យ៉ាងវិញទៀតលោក ចាន់ នួន មានបង្កាន់ដៃកាន់កាប់ដី ចេញដោយភូមិបាលស្រុកវាលវែង មានពាក្យស្នើសុំកាន់ កាប់ដីដោយមានការទទួលស្គាល់ចុះហត្ថលេខា និងត្រាដោយមេភូមិកណ្តាល និងមេឃុំថ្មដា តើអាចចាត់ទុកបានថា លោក ចាន់ នួន ទៅរំលោភយកដីលោក ស្វាយ សាម៉េត បានដោយរបៀបណា ? ។ មិនតែប៉ុណ្ណោះ ប្រជាពលរដ្ឋនៅឃុំថ្មដា បានផ្តិតមេដៃគាំទ្រទទួលស្គាល់ថា ជាដីរបស់លោក ចាន់ នួន រហូតដល់ ៨៧នាក់ ចំណែកលោក ស្វាយ សាម៉េត ផ្តិតមេដៃប្តឹងតែម្នាក់ឯងសោះ តើអាចចាត់ទុកភាពស្របច្បាប់ ក្នុងការទាមទារតាមបណ្តឹងសុំដីការសម្រេចរក្សាការពារពី លោក ស្វាយ សាម៉េត បានដោយរបៀបណា ក្រៅពីប្រើប្រាស់ទឹកលុយរបស់លោក ស្វាយ សាម៉េត ដើម្បីបង្គាប់ឱ្យតុលាការ ចេញដីកាកោះហៅទាំងបំពានបែបហ្នឹងបាន ។
មជ្ឈដ្ឋានអ្នកសិក្សាស្វែងយល់ពីអំពើពុករលួយបានហៅចំណាត់ការអង្គការប្រឆាំងអំពើពុករលួយ ដែលផ្អែកតែទៅ លើភស្តុតាងសូកប៉ាន់ជាក់ស្តែងគឺជាដំណើរការមិនអាចទប់ស្កាត់បទល្មើសពុករលួយបាននោះឡើយ ។ លោក ព្រាប កុល នាយកប្រតិបត្តិអង្គការតម្លាភាពកម្ពុជាបានបញ្ជាក់នៅក្នុងវេទិការទិវាប្រឆាំងអំពើពុករលួយថា ប្រជាជនកម្ពុជាចាត់ទុក ប្រព័ន្ធតុលាការថា បានប្រព្រឹត្តអំពើពុករលួយធ្ងន់ធ្ងរបំផុត ។ ប្រសិនបើអង្គភាពប្រឆាំងអំពើពុករលួយពិតជាមានឆន្ទៈលុប បំបាត់អំពើពុករលួយ ដើម្បីលើកស្ទួយប្រព័ន្ធយុត្តិធម៌នៅកម្ពុជាមែននោះ គឺមិនអាចរង់ចាំពិនិត្យតែទៅលើអំពើសូកប៉ាន់ជាក់ ស្តែងនោះទេ ! ពិសេសគឺវត្ថុតាងដែលបង្ហាញពីទឡ្ហីករណ៍រវាងភាគីណាមួយដែលអាចកំណត់បានទៅលើភស្តុតាង ជាក់ស្តែង ឈានទៅរកចំណាត់ការដែលអាចបង្កប់នូវអំពើពុករលួយ ទើបអាចលុបបំបាត់អំពើពុករលួយប្រកបដោយប្រសិទ្ធភាពបាន ។
ជាក់ស្តែងករណីបណ្តឹងលោក ស្វាយ សាម៉េត ចោទលោក ចាន់ នួន ពីបទរំលោភយកដី តើមានអ្វីសំអាងក្រៅពីអំពើ ពុករលួយ ដើម្បីជម្រុញឱ្យតុលាការចេញដីកាកោះជនរងគ្រោះឈ្មោះ ចាន់ នួន មកសាកសួរទៅកើតនោះបើសូម្បីឯកសារ ពាក់ព័ន្ធទៅនឹងដីក៏គ្មានមួយសន្លឹកផងនោះ ៕
