ខេត្តរតនគិរីៈគ្រឿងញៀនប្រភេទម៉ាទឹកកកទម្ងន់១គីឡូក្រាមត្រូវបានកម្លាំងនគរបាលកណ្តាលនៃស្នងការនគរបាលខេត្តរតនគិរីបង្ក្រាបបានកាលពីវេលាម៉ោង៣រសៀលថ្ងៃទី២៧ខែសីហាឆ្នាំ២០១៤ដោយចាប់បានជនសង្ស័យជាអ្នកនាំគ្រឿងញៀនចូលមកពីប្រទេសឡាវចំនួន១នាក់ឈ្មោះសេវទុលជនជាតិចារ៉ាយអាយុ៤៩ឆ្នាំមានទីលំនៅភូមិញ៉ាងឃុំញ៉ាងស្រុកអណ្តូងមាសខេត្តរតនគិរីរួមមាន វត្ថុតាង គ្រឿងញៀន ប្រភេទ ម៉ាទឹកកក ១គីឡូក្រាម និងម៉ូតូ ម៉ាកវ៉េវឆ្លាម ពាក់ស្លាកលេខ ភ្នំពេញ 1Z-1488 មួយគ្រឿង នៅត្រង់ចំណុច ភូមិ វាលព្រីង សង្កាត់ សាមគ្គី ខេត្តស្ទឹងត្រែង ។
បើតាមការ ផ្តល់ព័ត៌មាន ពីមន្ត្រី នគរបាល ដែលបានចុះ ទៅបង្ក្រាប ករណី គ្រឿងញៀននេះ បានឲ្យដឹងថា គឺដោយមាន ការចង្អុលបង្ហាញ ណែនាំពី លោកឧត្តម សេនីយ នួន គឿន ស្នងការ និងស្នងការរង ដែលដឹកនាំដោយ ព្រះរាជអាជ្ញា កម្លាំងជំនាញ នគរបាល បង្កប់លាក់ខ្លួន ក្នុងព្រៃ អស់ជាច្រើនថ្ងៃ គឺក្រោយពី ធ្វើការស្រាវជ្រាវ ទទួលបាន ព័ត៌មានថា ជនសង្ស័យ នាំយក គ្រឿងញៀននេះ ពីប្រទេសឡាវ ចូលមកខេត្តរតនគិរី តាមច្រក ដំក្រឡអូរស្វាយ ប៉ុន្តែ ដោយសារតែ ផ្លូវនេះ វាលំបាក ទើបជនសង្ស័យបានបង្វែល ទិសដៅ នាំយក គ្រឿងញៀនេះ តាមព្រំប្រទល់ ប្រទេសឡាវ ខេត្ត ស្ទឹងត្រែងវិញ ក្នុងគោល បំណង យកមក ចែកចាយ លក់នៅខេត្ត រតនគិរី ។
ហើយនៅពេល ដែលជន សង្ស័យ ឈ្មោះ សេវ ទុល នេះបាននាំយក គ្រឿងញៀន ពីជនជាតិឡាវ ដឹកតាមម៉ូតូ ឆ្លងកាត់ចំណុច កើតហេតុ ខាងលើនោះ សមត្ថកិច្ច នគរបាល ដែលធ្វើការ ទៅតាម ជំនាញ នោះ ចាប់ឃាត់ខ្លួន បានតែម្តង រួមទាំង គ្រឿងញៀន ប្រភេទ ម៉ាទឹកកក ចំនួន១គីឡូក្រាម នៅជាប់ នឹងខ្លួនជន សង្ស័យឈ្មោះ សេវ ទុល នោះផងដែរ ។ ហើយនៅម៉ោង ៦ល្ងាច ទើបកម្លាំង ជំនាញ នគរបាល បាននាំយក ជនសង្ស័យរួមទាំង វត្ថុតាង មកដល់ ស្នងការ នគរបាល ខេត្ត រតនគិរី ដើម្បីកសាង សំណុំរឿង បញ្ជូនទៅ តុលាការ ចាត់វិធានការ តាមនិតិវិធីច្បាប់ ។
គួរបញ្ជាក់ ផងដែរថា នេះជាលើទី១ហើយ ដែលស្នងការ នគរបាលខេត្ត រតនគិរី បង្ក្រាបបាន នូវគ្រឿងញៀន ទ្រុងទ្រាយធំ ហើយក៏ជា ស្នាដៃ ដឹកនាំមួយ ដែលលោក ឧត្តមសេនីយ៍ នួន គឿន បានមក ទទួលភារកិច្ច ជាស្នងការខេត្ត បានតែ ប៉ុន្មានខែ ប៉ុណ្ណោះ អាចបង្ក្រាប បានករណី គ្រឿងញៀន ដ៏ធំនេះ ៕
ដោយៈ តាំង ឧសារ
