កឹម មនោវិទ្យា ពេញចិត្ត តំណែង សមាជិក (គ.ជ.ប)

ទោះបីមាន ការខ្វែងគំនិត ចំពោះបេក្ខភាព សមាជិក គណកម្មាធិការ ជាតិរៀបចំ ការបោះឆ្នោត ដែលជាកូនអនុប្រធាន គណបក្សសង្រ្គោះជាតិ លោកកឹម សុខា ប៉ុន្តែវាស្ថិតនៅក្នុង កម្រិតតិចតួច ត្រឹម៥ភាគរយ ប៉ុណ្ណោះ ។ ចំណែក៩៥ ភាគរយទៀត បានសម្តែងនូវ ការពេញចិត្តថា ទាំងសមត្ថភាព និងសីលធម៌ រួមទាំងចរិយាសម្បត្តិ ដែលគណបក្ស សង្រ្គោះជាតិ ត្រូវតែបែងចែកឲ្យដាច់ ដើម្បីរក្សាបាន នូវភាពជា អ្នកទទួល ខុសត្រូវ លើកំណែទម្រង់ ប្រព័ន្ធបោះឆ្នោត ឲ្យដំណើរការ ប្រកបដោយ ស្មារតីទទួលខុសត្រូវ ពិតប្រាកដ ។ បក្សប្រឆាំង​ មិនទាន់បានកាន់ អំណាចនៅឡើយទេ ដូច្នេះតម្រូវឲ្យ មានការធានាលើ ប្រព័ន្ធបោះឆ្នោតមួយ អាចឲ្យជឿទុកចិត្តបាន ។ ព្រោះរយៈកាល កន្លងមក ទោះបីមាន បេក្ខភាពបក្សប្រឆាំង ចូលទៅក្នុងតួនាទី ជាសមាជិកគណ កម្មាធិការជាតិ រៀបចំ ការបោះឆ្នោត ប៉ុន្តែលទ្ធផលគឺ អវិជ្ជមាន ឈានទៅរក ការមិនជឿទុកចិត្ត ក្រោយការបោះឆ្នោត ជាច្រើនអាណត្តិ មកហើយ ។ ដូច្នេះ ដើម្បីធានា ដល់គុណប្រយោជន៍ ក្នុងបក្ស សង្រ្គោះជាតិ ទោះបីជា កញ្ញា កឹម មនោវិទ្យា ជាកូនស្រីរបស់ អនុប្រធានបក្ស ក៏ដោយ ប៉ុន្តែសំខាន់គឺ អាចធានាបាន លើការកែទម្រង់ ប្រព័ន្ធបោះឆ្នោត ពិតប្រាកដ ដើម្បីបញ្ចប់ជម្លោះ ក្រោយការបោះឆ្នោត តទៅទៀត ។ ព្រោះតំណាក់កាល បក្សសង្រ្គោះជាតិ ដែលមិនទាន់បាន កាន់អំណាច ក្នុងរាជរដ្ឋាភិបាល នៅឡើយ គឺវាមិនមែន ជាបញ្ហា សម្រាប់ការរិះគន់ លើខ្សែស្រឡាយ អ្វីនោះឡើយ ។