រយៈកាលកន្លងមកគេធ្លាប់តែឮអ្នកមានអំណាច អ្នកមានប្រាក់វាតទីដីបឹងរួមមាន បឹងកក់ បឹងស្នោ បឹងទំពន់ បឹងបាយ៉ាប ជាដើម… ៘ បង្កការក្តៅក្រហាយដល់ពលរដ្ឋមិនតិចទេ ដែលចេញមុខតវ៉ានៅសាលាក្រុង ភ្នំពេញ ។ ទំនងជាអស់បឹងនៅភ្នំពេញលក់ហើយ ទើបកើតចលាចលរឿងអ្នកមានប្រាក់ ឃុបឃិតជាមួយអ្នកមាន អំណាចប្លន់ យកដីវត្តធ្វើបូរីលក់យ៉ាងដូច្នេះទៅវិញ ។
ផ្អែកតាមពាក្យបណ្តឹងរបស់ព្រះចៅអធិការវត្តពោធិ៍វង្ស ស្ថិតនៅភូមិបឹងបាយ៉ាប សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ បានចម្រើនពរគោរពជូនសម្តេចអគ្គមហាសេនាបតីតេជោ ហ៊ុន សែន ជានាយករដ្ឋមន្ត្រី ប្តឹងឈ្មោះ ឈាង ប៉ាក់សួរ ដែលឃុបឃិត និងលោក ជា ខេមា អភិបាលរងខណ្ឌសែនសុខ រំលោភបំពានយកដីកម្មសិទ្ធិស្របច្បាប់របស់វត្តកោះពោធិ៍វង្ស មកលក់ដូរ ។ ប៉ុន្តែដីវត្តដែលឧកញ៉ា ឈាង ប៉ាក់សួរ ឃុបឃិតជាមួយអភិបាលរងខណ្ឌសែនសុខលក់នោះ គឺមានសេចក្តីសម្រេចទទួលស្គាល់ថា ជាដីវត្តតាមរយៈ សេចក្តីសម្រេចលេខ ៣៩ ក.ធ.ស.សរ ចុះថ្ងៃទី ២១ ខែកុម្ភៈ ឆ្នាំ២០០៦ របស់ ឯកឧត្តម ឃុន ហាំង អតីតរដ្ឋមន្ត្រី ក្រសួងធម្មការ និងសាសនា និងលិខិតលេខ ៥៦៤/០៩ កធស ចុះថ្ងៃទី ១៥ ខែកញ្ញា ឆ្នាំ២០០៩ របស់ ឯកឧត្តម មិន ឃិន រដ្ឋមន្ត្រីក្រសួងធម្មការ និងសាសនា ថែមទៀតផង ។
ចំណែកឧកញ៉ា ឈាង ប៉ាក់សួរ បានបញ្ជាក់តាមទូរស័ព្ទថា លោកមិនមែនជាឧកញ៉ានោះទេ ប៉ុន្តែគ្រាន់តែ ជាតំណាងឱ្យឧកញ៉ា ឃុន ស៊ា តែប៉ុណ្ណោះ ។ រីឯលោកអភិបាលរងខណ្ឌ ជា ខេមា គឺមិនអាចទាក់ទងតាមទូរស័ព្ទ បានឡើយ ព្រោះបើតាមការអះអាងនៅក្នុងពាក្យបណ្តឹងរបស់ព្រះចៅអធិការវត្ត គឺអភិបាលរងខណ្ឌសែនសុខ ជា ខេមា បានរំលោភយកដីវត្ត ទទឹង ៣០ម៉ែត្រ បណ្តោយ ១៧០ម៉ែត្រ ឃុបឃិតជាមួយ ឈាង ប៉ាក់សួរ លក់ឱ្យបុរីប៉េងហួត សាងសង់ជាផ្ទះល្វែងលក់ទៅវិញ ។
ជុំវិញករណីខាងលើ កញ្ញា ជាវ សម្បត្តិ អ្នកនាំពាក្យបុរីប៉េងហួត បានធ្វើការអះអាងថា ចំពោះផ្ទះនៅបូរី ដែលមានទំនាស់ គឺបានចេញប្លង់ឱ្យអតិថិជនអស់ហើយ ដែលមកទិញ ។ ហើយរឿងទំនាស់ ទាំងប៉ុន្មាន គឺទុកឱ្យលោក ឈាង ប៉ាក់សួរ ដោះស្រាយតែជាមួយវត្តទៅ អត់ពាក់ព័ន្ធជាមួយបុរីប៉េងហួតឡើយ ។ មានន័យថា លោក ឈាង ប៉ាក់សួរ គឺជាអ្នកគួកជេរដីវត្តក្រោមអំណាចលោក ជា ខេមា ទៅឱ្យបុរីប៉េងហួត បើចង់ឱ្យបញ្ហា អាចដោះ ស្រាយបានលើកលែងតែអភិបាលរាជធានីភ្នំពេញ ចេញមុខកោះអញ្ជើញតំណាងក្នុងវត្ត និងអភិបាលរងខណ្ឌ ជា ខេមា មកឆ្លើយបំភ្លឺ ទើបអាចស្វែងរកការពិតឃើញពិតប្រាកដ ៕
