ខេត្តរតនគិរីៈលោកអេងចំណាប់ចៅក្រមអមសាលាដំបូងខេត្តរតនៈគិរីចុះអនុវត្តន៍ដីកាដឹកនាំកម្លាំងសមត្ថកិច្ចចម្រុះធ្វើការរុះរើផ្ទះរបស់ប្រជាពលរដ្ឋដែលសាងសង់អាណាធិបតេយ្យនៅលើដីរបស់រដ្ឋ ដែលវិនិយោគឲ្យក្រុមហ៊ុនស្វីហ្វរ៉ាប៊រលីមីធីតចំការកៅស៊ូខេត្តរតនៈគិរីកាលពីព្រឹកថ្ងៃទី២១ខែឧសភាឆ្នាំ២០១៤នៅតាមបណ្តោយផ្លូវជាតិលេខ៧៨Aស្ថិតនៅភូមិថារ៉ងជងឃុំអូរជុំស្រុកអូរជុំខេត្តរតនៈគិរី ។ក្នុងការចុះអនុវត្តន៍ដីការុះរើផ្ទះប្រជាពលរដ្ឋដែលសាងសង់យ៉ាង អាណាធិបតេយ្យនៅទីតាំងខាងលើនេះគេសង្កេតឃើញមានកម្លាំងសមត្ថកិច្ចចម្រុះជាច្រើនដូចជាកម្លាំង នគរបាលខេត្ត កងរាជអាវុធខេត្តកម្លាំងកម្មកររបស់ក្រុមហ៊ុននិងប្រជាការពារជាច្រើននាក់ទៀតមកការពារនិងធ្វើការរុះរើផ្ទះប្រជាពលរដ្ឋដែលទើបសាងសង់អាណាធិបតេយ្យថ្មីៗហើយបានធ្វើការរុសរើផ្ទះដែលទើបសាងសង់ថ្មីបានចំនួន១៥ផ្ទះបានយ៉ាងល្អដោយសន្តិវិធីដោយផ្ទះខ្លះម្ចាស់បានធ្វើការរុសរើដោយខ្លួនឯងព្រោះថាការចុះអនុវត្តន៍ដីកានេះរុះរើតែផ្ទះណាដែលទើបតែសាងសង់ថ្មីនោះទេមិនធ្វើការរុះរើផ្ទះចាស់ដែលប្រជាពលរដ្ឋរស់នៅកន្លងមកនោះឡើយ ។ដំណើរការរុះរើផ្ទះប្រជាពលរដ្ឋជាបន្តបន្ទាប់នេះក៏បានឈានមកដល់ផ្ទះមួយខ្នងទៀតប៉ុន្តែត្រូវរាំងស្ទះដោយមានការតវ៉ារារាំងពីប្រជាពលរដ្ឋមិនឲ្យធ្វើការរុះរើជាដាច់ខាតព្រោះថាផ្ទះនេះជាផ្ទះចាស់ដែលបានសាងសង់យូរមកហើយហើយក្នុងការរុះរើផ្ទះនេះទៀតសោត គឺសមត្ថកិច្ចបានសន្យាអះអាងជាមួយប្រជាពលរដ្ឋថារុសរើតែផ្ទះសង់ថ្មីៗតែប៉ុណ្ណោះ ។ដោយមានការរារាំងពីប្រជាពលរដ្ឋមិនឲ្យសមត្ថកិច្ចធ្វើការរុះរើ យ៉ាងដាច់ខាតបែបនេះក៏បណ្តាលឲ្យ មានភាពរញ៉េរញ៉ៃយ៉ាងខ្លាំងហើយប្រជាពលរដ្ឋខ្លះបានយំស្រែកព្រមទាំងកាន់ដបសំាងផងហើយអ្នកខ្លះទៀតយំសុំអង្វរកុំឲ្យធ្វើការរុសរើផ្ទះរបស់ពួកគាត់ទៀតព្រោះពួកគាត់ក្រីក្រមិនដឹងជាទៅរស់នៅទីណាឡើយ ។ខណៈពេលប្រជាពលរដ្ឋតវ៉ារារាំងស្រែកយំសុំអង្វរបែបនេះកម្លាំងសមត្ថកិច្ចចម្រុះក៏បានផ្អាកធ្វើការរុះរើនិងដកថយទៅមូលដ្ឋានរបស់ខ្លួនវិញនៅម៉ោងជាង២រសៀលថ្ងៃទី២១ខែឧសភាឆ្នាំ២០១៤ ។
គួរបញ្ជាក់ថាលុះដល់ព្រឹកថ្ងៃទី២២ខែឧសភាឆ្នាំ២០១៤កម្លាំងសមត្ថកិច្ចចម្រុះ ដដែលបានបន្ថែមកម្លាំងមកច្រើនជាងមុនទៅទៀតដែលដឹកនាំដោយលោក អេងចំណាប់ចៅក្រមអមសាលាដំបូងខេត្តនិងមានឡានទឹក១គ្រឿងផងដែរបានមកធ្វើការរុះរើសារជាថ្មីម្តងទៀតប៉ុន្តែគ្រាន់តែកម្លាំង សមត្ថកិច្ចចម្រុះនិងឡានទឹកមកដល់ទីតាំខាងលើភ្លាមនោះត្រូវប្រជាពលរដ្ឋទាំងអស់នាំគ្នាយកដើមនិងមែកកៅស៊ូមកដាក់លើផ្លូវជាតិបិទជិតធ្វើឲ្យកកស្ទះចរាចរណ៍ពេញផ្លូវមិនអាចធ្វើដំណើរបានហើយនាំគ្នាតវ៉ារារាំងមិនឲ្យសមត្ថកិច្ចធ្វើការរុះរើផ្ទះរបស់ពួកគាត់ជាដាច់ខាតមិនថាផ្ទះចាស់ឫផ្ទះថ្មីនោះឡើយព្រោះពួកគាត់លែងជឿទៀតហើយការសន្យាអះអាងភូតកុហករបស់សមត្ថកិច្ចដែលថារុះរើតែផ្ទះសង់ថ្មីនោះមិនពិតនោះទេ ។ប្រជាពលរដ្ឋទាំងអស់បាននាំគ្នាស្រែកតវ៉ារារាំងបិទផ្លូវរយៈពេល ជិត២ម៉ោងធ្វើឲ្យមានការកកស្ទះដោះស្រាយមិនចេញទើបសមត្ថកិច្ចសុំធ្វើការចរចារជាមួយប្រជាពលរដ្ឋដោយសន្តិវិធីហើយដោយមានការជួយសម្របសម្រួលពីអង្គការសិទ្ធមនុស្សផងនោះបានចរចារគ្នាអស់រយៈពេលជិត១ម៉ោងហើយប្រជាពលរដ្ឋក៏បានសុំណូមពរឲ្យកម្លាំងសមត្ថកិច្ចក៏ដូចជាកម្លាំងកម្មកររបស់ក្រុមហ៊ុនវិលត្រលប់ទៅវិញទើបចរចារត្រូវគ្នាហើយសមត្ថកិច្ចបាននិយាយថានៅថ្ងៃទី២៣ខែឧសភាពឆ្នាំ២០១៤នេះនិងមានខាងក្រសួងកសិកម្មចុះមកដល់ហើយនិងជួបប្រជុំ ដោះស្រាយជាមួយបងប្អូនប្រជាពលរដ្ឋទាំងអស់គ្នា ។
ក្រោយពីការចរចារគ្នារវាងសមត្ថកិច្ចនិងប្រជាពលរដ្ឋបានត្រូវរ៉ូវគ្នារួចហើយនោះប្រជាពលរដ្ឋទាំងអស់ក៏បាននាំគ្នារើដើមនិងមែកកៅស៊ូចេញពីផ្លូវបើកឲ្យ ចរាចរណ៍ធម្មតាវិញហើយកម្លាំងសមត្ថកិច្ចទាំងអស់ក៏បានយល់ព្រមដកថយវិលត្រឡប់ទៅតាមមូលដ្ឋានរៀងៗខ្លួនវិញនៅម៉ោង១០និង៣០នាទីព្រឹកថ្ងៃដដែលនេះ ៕
តាំង ឧសារ
ប្រជាពលរដ្ឋដាក់ដើមនិងមែកកៅស៊ូដើម្បីបិទផ្លូវ
កម្លាំងចម្រុះដឹកនាំដោយព្រះអជ្ញារអនុវត្តរុះរើផ្ទះប្រជាពលរដ្ឋនៅចម្ការកៅស៊ូអូរជុំ
