ខេត្តរតនគិរីៈ មានក្រុមកម្មករជាច្រើន បានប្រមូលផ្តុំគ្នា មកជីករុករកមាសជាច្រើន យ៉ាងអាណាធិបតេយ្យ នៅក្នុងព្រៃត្រង់ចំណុច អូរកញ្ញា ហៅអូរបាមូក ស្ថិតនៅភូមិព្រៃមាស ឃុំបរខាំ ស្រុកអូរយ៉ាដាវ ខេត្តរតនគិរី ។
ប្រភពព័ត៌មានពីប្រជាពលរដ្ឋ នៅឃុំបរខាំ បានប្រាប់ឲ្យដឹងថា ការជីករករ៉ែមាសនេះ មានតាំងពីយូរឆ្នាំមកហើយ មានទាំងខ្មែរ និងវៀតណាមផងដែរ ដែលនាំគ្នាមកប្រកបមុខរបរនេះ ហើយឥឡូវនេះ នៅតែមានអ្នកមកជីក រុករករ៉ែមាសកាន់តែច្រើន ទៀតផង ។
ប្រភពដដែលបានបន្តទៀតថា ពីមុនមកអ្នកភូមិនាំគ្នា ជីករ៉ែមាស រ៉ែងដោយដៃ ប៉ុន្តែបច្ចុប្បន្ននេះ គេជីករ៉ែមាសយក អាចម៌ដីមករ៉ែងនឹងម៉ាស៊ីន ពាក់កណ្តាលស្វ័យប្រវត្តិ ធ្វើឲ្យមានការប៉ះពាល់យ៉ាងខ្លាំងដល់ធនធានធម្មជាតិ ក៏ដូចជាសត្វពាហណៈជាដើម ព្រោះថាម៉ាស៊ីរ៉ែងយកមាសនេះ មានកញ្ចែ្រងទប់មាស និងបង្ហូរកម្ទេចរ៉ែចេញមកក្រៅ តាមទរទឹកចូលទៅក្នុងអូរ ។ ប្រភពពីប្រជាពលរដ្ឋដដែលបាន បញ្ជាក់ទៀតថា ការជីករុករករ៉ែមាសនេះ ពួកគាត់សន្និដ្ឋានថា អាជ្ញាធរ និងសមត្ថកិច្ចមិនអាច ធ្វើការ បង្ក្រាបបានទេ ពីព្រោះពួកគាត់ឃើញ មានមនុស្សមកជីករ៉ែមាសរហូត និងយូរឆ្នាំមកហើយមិនដែលឈប់នោះទេ ។
ទាក់ទិនទៅនឹង ការជីករ៉ែមាសអាណាធិបតេយ្យ នៅទីតាំងខាងលើនេះ អ្នកសារព័ត៌មានយើង បានទូរស័ព្ទទៅលោករម៉ាម ផាត មេប៉ុស្តិ៍ឃុំបរខាំ លោកប្រាប់ថា រឿងនេះលោកបានដឹងដែរ ព្រោះរឿងនេះយូរឆ្នាំមកហើយ លោកក៏មិនបានទទួល ផលប្រយោជន៍ពីការជីក រ៉ែមាសនេះដែរ លោកនិយាយថា ការជីករ៉ែមាសនេះគ្មានច្បាប់ រឺលិខិតអនុញ្ញាតិអ្វីទាំងអស់ ហើយលោកធ្លាប់បាន ធ្វើរបាយការណ៍ បញ្ជូនទៅថ្នាក់លើដែរ ប៉ុន្តែគ្មានចំណាត់ការ ណាមួយមកលោកវិញទេ គឺស្ងាត់ស្ងៀមគ្មានវិធានការ អ្វីទាំងអស់ ។ លោកបានបញ្ជាក់ថា ពីមុនមកមានទាំងថ្នាក់ខេត្ត តុលាការ និងមន្ទីររ៉ែ និងថាមពល ចុះមកដល់ទីតាំងជីករ៉ែមាសនេះដែរ ហើយអ្នកសារព័ត៌មាន បានទូរស័ព្ទទៅលោករម៉ាម ខេត មេឃុំបរខាំ លោកបានឆ្លើយថា មិនដឹងទេរឿងនេះ លោកគ្រាន់តែដឹងថា ពីមុនមានគេជីករ៉ែមាសមែន តែឥឡូវនេះលោកមិនដឹងទេ ពីព្រោះគ្មានរបាយការណ៍ណា បញ្ជូនមក លោកទេ ប៉ុន្តែលោកបាននិយាយថា ពីមុនមានគេខ្សឹបប្រាប់លោកថា គេបានបង់លុយឲ្យសមត្ថកិច្ច ទើបធ្វើបាន ចំណែកលោកជាមេឃុំ មិនបានទទួលផលប្រយោជន៍អ្វីនោះទេ ។ ចំណែកលោកដក សរ អភិបាលស្រុកអូរយ៉ាដាវ អ្នកសារព័ត៌មានយើង បានទូរស័ព្ទទៅលោកដើម្បីឲ្យជួយបំភ្លឺជុំវិញករណី ខាងលើនេះ លោកបានឆ្លើយថា លោកមិនដឹងថា មានគេជីករ៉ែមាសទៀតនោះទេ ពីព្រោះពីមុន លោក អភិបាលខេត្តធ្លាប់បាន ធ្វើការហាមឃាត់ច្រើនដង មកហើយដែរ ដោយពីមុនមកក៏មានក្រុមហ៊ុនធ្វើដែរ លោកគ្រាន់តែដឹងថា មានអ្នកជីករ៉ែមាសនៅទីនោះ លក្ខណៈគ្រួសារធម្មតាតិចតួច ហើយលោកក៏បាន ហាមឃាត់ដែរ តែចាំលោកសួរនាំទៅ លោកមេឃុំសិន ហើយលោកនឹងឲ្យកម្លាំងប៉ូលិស ប៉េអឹម ទៅមើលដល់កន្លែងជាក់ស្តែង តើអ្នកណាជាម្ចាស់? ហើយអ្នកណាខ្លះ? ស្នាក់នៅកន្លែងណា? រីឯលោកប្រធានមន្ទីររ៉ែ និងថាមពល អ្នកសារព័ត៌មានយើង មិនអាចសុំការបំភ្លឺណាមួយ ជុំវិញរឿងខាងលើបានទេ ដោយមិនអាចទំនាក់ទំនងបាន ។
គួរបញ្ជាក់ផងដែរថា បើអាជ្ញាធរ និងសមត្ថកិច្ចនៅតែ បណ្តែតបណ្តោយ មិនចាត់ វិធានការ ណាមួយ ទៅលើការជីកយក មាសទៀតនោះ វានឹងបណ្តាលឲ្យមាន ផលប៉ះពាល់យ៉ាងខ្លាំង ដល់ធនធាន ធម្មជាតិ និងសត្វពាហណៈ ហើយនិងអាចប៉ះពាល់ដល់ សុខភាពរបស់ប្រជាពលរដ្ឋ ដែលរស់នៅ ទីនោះទៀតផង ៕
ដោយៈ តាំង ឧសារ
