ដោយ ៖ ជាតិ
ការចុះបង្ក្រាបពីក្រុុមគយចល័ត កាលពីថ្ងៃទី ១៩ ខែកុម្ភៈ ឆ្នាំ ២០១៤ រឹបអូសបានប្រភេទទូរស័ព្ទដៃទំនើបម៉ាក អាយហ្វូន ហ្វាយ និងសាំស៊ុងចំនួន ៥វ៉ាលី នៅវេលាម៉ោង ៩ យប់ ត្រង់ ចំណុចស្រុកពួក ខេត្តសៀមរាប ត្រូវបានគេដឹងថា ជាកម្មសិទ្ធិរបស់ភរិយាលោក ឌួង ងៀប ដែលមានតួនាទីជាអនុប្រធាន នាយកដ្ឋានអន្តោប្រវេសន៍ថែមទៀតផង ។
ដោយលោក ឌួង ងៀប មានតួនាទីជា អនុប្រធាននាយកដ្ឋាន អន្តោប្រវេសន៍នេះហើយ ទើបធ្វើឱ្យភរិយាលោក ឌួង ងៀប មាន ឱកាសច្រើនក្នុងការទំនាក់ទំនងនាំទំនិញសំខាន់ៗពីបរទេសចូលមកកម្ពុជា តាមច្រកព្រលានយន្តហោះអន្តរជាតិដូច ករណីទូរស័ព្ទចំនួន ៥វ៉ាលី ដែលមន្ត្រីគយចល័តកំពុងរឹបអូសជាភស្តុតាងស្រាប់ ។
តាមការឱ្យដឹងពីមន្ញ្រីគយចល័តការចុះបង្ក្រាបទំនិញគេចពន្ធទាំងយប់ គឺធ្វើឡើងតាមបទបញ្ជាលោក កើត សុធារ៉ា ប្រធានក្រុមគយចល័តទូទាំងប្រទេស ។ មិនដឹងថា ការនាំប្រភេទទូរស័ព្ទដៃទំនើបឆ្លង កាត់ព្រលានយន្តហោះ ខេត្ត សៀមរាប ដែលប្រើសុទ្ធសឹងតែម៉ាស៊ីនស្គែនខ្នាតអន្តរជាតិអាចលាក់បាំងពីភ្នែកលោកមេគយ ខៀវ សំអាន ប្រចាំនៅ ព្រលានយន្តហោះ អន្តរជាតិខេត្តសៀមរាប បានដោយរបៀបណានោះឡើយ ។ ឬថាក្រោមឥទ្ធិពលលោក ឌួង ងៀប ជា អនុប្រធាននាយកដ្ឋាន អន្តោប្រវេសន៍ ត្រូវបានក្រុមគយនៅច្រកព្រលាន យន្តហោះអន្តរជាតិ រួមទាំងច្រកទ្វារ អន្តរជាតិ នៅទូទាំងប្រទេសមានភាពស្និទ្ធស្នាលជាមួយមុខរបរក្រុមគ្រួសារលោក ឌួង ងៀប អស់ទៅហើយ ទើបមិនអាចប្រើ ម៉ាស៊ីនស្គែន មើលឃើញទូរស័ព្ទដៃ ប្រភេទទំនើបរហូតដល់ទៅ ៥វ៉ាលី ចូលតាមព្រលានយន្តហោះអន្តរជាតិ ខេត្ត សៀមរាប បែបហ្នឹង ។
ពិតណាស់ថា លោក ឌួង ងៀប មិនត្រឹមតែមានតួនាទីជាអនុប្រធាននាយកដ្ឋាននគរបាលអន្តោប្រវេសន៍ប៉ុណ្ណោះទេ គឺ ថែមទាំងបើកក្រុមហ៊ុន DNG និងសំណង់គ្រប់ប្រភេទរួមទាំងម៉ៅការដេញថ្លៃយកផ្លាកយីហោផ្សេងៗនៅទូទាំងរាជធានី ភ្នំពេញថែមទៀតផង ។ បើគ្រាន់តែនៅតាមព្រលានយន្តហោះក៏ភរិយាលោក ឌួង ងៀប អាចនាំប្រភេទទូរស័ព្ទទំនើប ចូលគេចពន្ធបានដល់ទៅ ៥វ៉ាលី ទៅហើយនោះ តើនៅមានទំនិញគេចពន្ធប៉ុន្មានសិបមុខទៀត ពិសេស គឺគ្រឿងសំណង់ ដែល ក្រុមហ៊ុននេះបាននាំចូលតាមច្រកទ្វារអន្តរជាតិដែលមានព្រំប្រទល់ជាប់នឹងប្រទេសវៀតណាម និងប្រទេសថៃនោះ ។
បើស្ថិតនៅក្រោមការដឹកនាំប្រកបដោយគតិបណ្ឌិត របស់ប្រមុខរាជរដ្ឋាភិបាលអាណត្តិទី ៥ នៅតែបន្តផ្តល់ឱកាសឱ្យ មន្ត្រី មានអំណាចយកឥទ្ធិពលខ្លួនទៅបើកក្រុមហ៊ុនរកស៊ីតាមបែបទុច្ចរិតដូចករណីលោកឧត្តមសេនីយ៍ ឌួង ងៀប ជាគំរូទេ នោះ បញ្ហាប្រមូលពន្ធចូលថវិកាជាតិ គឺពិតជាត្រូវបាត់បង់មិនតិចទេ ។ ជាក់ស្តែងការនាំប្រភេទ ទូរស័ព្ទចូល តាមច្រកព្រលាន យន្តហោះអន្តរជាតិខេត្តសៀមរាបជាភស្តុតាងស្រាប់ ដែលប្រមុខរាជរដ្ឋាភិបាល មិនគួរមើលរំលង នោះទេ ចំពោះមុខរបរទុច្ច រិតដែលផ្តើមចេញពីក្រុមគ្រួសារអ្នកមានអំណាច ៕
