ខេត្តរតនគិរីៈ មានករណីគួរឲ្យមាន ការភ្ញាក់ផ្អើលមួយ ទាំងកណ្តាលយប់ ថ្ងៃទី២១ ខែកុម្ភៈ ឆ្នាំ២០១៤វាលាម៉ោង១១ និង៣៥នាទីយប់ ដែលបង្កឡើងដោយសារ តែរថយន្តម៉ាកបាឡែន ពណ៌ខ្មៅពាក់ស្លាកលេខភ្នំពេញ 2D-9377 របស់កងរាជវុធហត្ថ ដែលគេស្គាល់ម្ចាស់ រថយន្តឈ្មោះ បញ្ញា ប្រចាំការនៅស្នាក់ការ782 អូរយ៉ាដាវ និងរួមដំណើរដោយ ប៉េអឹមម្នាក់ទៀតឈ្មោះ រ៉ូស្សា បានបើកបរ ក្នុងល្បឿនយ៉ាងលឿនរ៉េចង្កូតឡើងលើ ឃឿនផ្លូវបុករះផ្ទះប្រជាពលរដ្ឋ ចំនួន២ជាប់ៗគ្នា បណ្តាលអោយខូចខាត ទ្រព្យសម្បត្តិ និងសំភារៈ របស់ពួកគាត់ អស់ជាច្រើន ។ បើតាមសាក្សី នៅកន្លែងកើតហេតុ បានឲ្យអ្នក យកពត៌មានជាតិ ប្រចាំខេត្តរតនគិរី អោយដឹងថា រថយន្ត បង្កហេតុម៉ាកបាឡែន ដែលបើកបរ ដោយប៉េអឹម ខាងលើនេះ បានបើកក្នុង ល្បឿនលឿន ទំនងជាក្នុងអាការៈស្រវឹងទៀតផង បើកបរក្នុងទិសដៅ ពីកើតទៅលិច ក៏ស្រាប់តែមកដល់ ត្រង់ចំណុច កើតហេតុខាងលើ គឺជាប់នឹងចុះចំណោទ ខាងមុខវត្តភ្នំស្វាយ ស្ថិតក្នុងភូមិ៣ សង្កាត់បឹងកន្សែង ក្រុងបានលុង គឺបានរ៉េចង្កូតឡើងមកលើឃឿន ជញ្ចើមផ្លូវ បុកដើមចំប៉ា បាក់អស់២គុម្ភ និងជ្រុលទៅបុកផ្ទាំងប៉ាណូ បាក់មួយទៀត ហើយក្រោយហេតុការណ៍នេះ បានកើតឡើង ទំនងជាម្ចាស់បាត់បង់ ការគ្រប់គ្រងនូវ ការបញ្ជាយាន្តយន្តហើយបានជានល្បឿន បន្ថែមទៀតបណ្តាលឲ្យ ជ្រុលទៅបុករះផ្ទះជួល របស់ ប្រជាពលរដ្ឋ អស់ចំនួន២នៅជាប់ៗ គ្នាទៀត រហូតដល់រថយន្ត ផ្ទុះពោងទៅមុខលែងរួច ។
ចំណែកឯម្ចាស់រថយន្ត ដែលគេស្គាល់ថាឈ្មោះ បញ្ញា ជាប៉េអឹមប្រចាំការ នៅស្នាក់ការ782 អូរយ៉ាដាវ និងប៉េអឹមម្នាក់ទៀតឈ្មោះ រ៉ូស្សា ត្រូវរងរបួសជាទម្ងន់ ត្រូវបានគេបញ្ជូន ទៅសង្គ្រោះ នៅមន្ទីរពេទ្យ ឯកជនមួយ នៅក្រុងបានលុង យ៉ាងតក់ក្រហល់ ជាទីបំផុត ។
បើតាមការរៀបរាប់ ឲ្យដឹងពីម្ចាស់ផ្ទះ ដែលរងគ្រោះទី១ ឈ្មោះ គឹម យន់ អាយុ៤៣ឆ្នាំ ប្រពន្ធឈ្មោះធី ស្រីមុំ អាយុ៤០ឆ្នាំ មុខរបរលក់ចាបហួយ ជាផ្ទះរបស់គាត់ ត្រូវបានរថយន្តនេះ បុករះចូលបណ្តាលឲ្យ ខូចខាតសម្ភារៈ និងទ្រព្យសម្បត្តិ បើគិតជាទឹកប្រាក់ អស់ជាង២០០០$ ចំណែកឯម្ចាស់ផ្ទះទី២ ឈ្មោះ ហ៊ី វុទ្ធី អាយុ២៨ឆ្នាំ មុខរបរជាងគំនូរ ក៏ត្រូវរថយន្តបង្កហេតុនេះ បុករះចូលបណ្តាលឲ្យ ខូចខាតសម្ភារៈ និងទ្រព្យសម្បត្តិ គិតជាទឹកប្រាក់ អស់ជាង១០០០$ផងដែរ ។ ប៉ុន្តែក្រៅពីសម្ភារៈ និងទ្រព្យសម្បត្តិម្ចាស់ផ្ទះទាំងពីរ មិនមានអ្នករងគ្រោះថ្នាក់ទេ ។ ព្រោះថាសំណាងល្អ រថយន្តបានផ្ទុះពោង ទៅមុខលែងរួចកុំអីត្រូវចូលដល់ កន្លែងម្ចាស់ផ្ទះ ដែលកំពុងតែដេក លង់លក់នោះ គ្រោះថ្នាក់មិនខានឡើយ ។ ហើយម្យ៉ាងវិញទៀត បើសិនជាគ្រោះថ្នាក់ ចរាចរណនោះ នៅចន្លោះម៉ោង៦ រឺ៧វិញ អាចនឹងមាន អ្នករងគ្រោះច្រើនព្រោះថាកន្លែងនេះ មានមនុស្សអូរអរច្រើន គួរសមដែរ ។
ប្រជាពលរដ្ឋ បានសុំឲ្យអស់លោក ដែលមានយានយន្ត រឺអ្នកបើកបររថយន្តគ្រប់ប្រភេទ ត្រូវគោរព ច្បាប់ចរាចរណ៍ផ្លូវគោក ត្រូវបើកបរក្នុងល្បឿន ដែលច្បាប់បានកំណត់ នៅទីប្រជុំជន ជៀសវាងកុំឲ្យមាន គ្រោះថ្នាក់ដូចពេលនេះទៀត ។
ក្រោយហេតុការណ៍ គ្រោះថ្នាក់ចរាចរណ៍នេះ បានកើតឡើង នគរបាលមូលដ្ឋាន សហការ និងនគរបាលចរាចរណ៍ ផ្លូវគោក ចុះទៅធ្វើការវាស់វែង និងយករថយន្ត បង្កហេតុរក្សាទុកនៅ ស្នងការនគរបាលខេត្ត ដើម្បីចាត់ការទៅតាម និតិវិធីច្បាប់ ចរាចណ៍ផ្លូវគោក ៕
ដោយ តាំង ឧសារ
