ដោយ ៖ ជាតិ
បាត់ដំបង ៖ ប្រភេទឈើគ្រញូងជាច្រើនដូចឃើញ ក្នុងរូបភាពនេះស្រាប់ ត្រូវបានគេដឹកចេញពីស្រុក សំឡូតមកស្តុបទុកនៅបរិវេណឃ្លាំងក្នុងភូមិចំការ សំរោង សង្កាត់ចំការសំរោង ក្រុងបាត់ដំបង ខេត្ត បាត់ដំបង ។ ថៅកែឈើគ្រញូងដែលរក ស៊ីដុះស្លែ ជាង១០ឆ្នាំមកហើយ មានឈ្មោះ ហេង ដែលមាន ខ្នងបង្អែកជាមន្ត្រីកងរាជអាវុធហត្ថខេត្តបាត់ដំបង ឈ្មោះ ហ៊ីង វាសនា ។
ឈើគ្រញូង ថៅកែ ហេង ត្រូវបានគេដឹកស្តុបទុកនៅភូមិចំការសំរោងផង រួចនាំមកស្តុបទុកនៅឃុំ ព្រៃស្វាយ ស្រុកមោងប្ញស្សី ខេត្តបាត់ដំបងផង ទើបបន្តនាំចេញទៅភ្នំពេញ ។ ឈើគ្រញូងដែលរត់ ការដឹកចេញពីសំឡូតមកកាន់ ខេត្តបាត់ដំបង ត្រូវបានលោក ហ៊ីង វាសនា រត់ការផ្លូវជាមុនរួចរាល់អស់ហើយ ព្រោះឡានសាំយ៉ុង ដែលផ្ទុយឈើគ្រ ញូង ដែលមានរថយន្តឆ្លាមនាំមុខត្រូវបានមន្ត្រីជំនាញ និងសមត្ថកិច្ចស្គាល់ និងបើកផ្លូវដឹកជញ្ជូនដោយគ្មានការរំខានពី មន្ត្រីសមត្ថកិច្ចគ្រប់ផ្នែកឡើយ ។
ប្រភពព័ត៌មានច្បាស់ការបានឱ្យដឹងថា កាលពីយប់ថ្ងៃទី ៨ មិថុនា ឆ្នាំ ២០១៣ ថៅកែ ហេង បាននាំចេញឈើគ្រញូងមកភ្នំពេញមួយជើងដោយមានលោកមន្ត្រីកងរាជអាវុធហត្ថ ឈ្មោះ ហ៊ីង វាសនា ជាអ្នករត់ការផ្លូវថែមទៀតផង ។ នៅយប់ថ្ងៃទី ១៥ មិថុនា ឆ្នាំ ២០១៣ ឈើគ្រញូងថៅកែ ហេង បាននាំចេញមកភ្នំពេញបានដោយរលូន ព្រោះថែមទាំងមានរថយន្តឡិចស៊ិស ៥៧០ ពណ៌ខ្មៅនាំមុខថែមទៀតផង ។
ទាំងមន្ត្រីជំនាញមេព្រៃខេត្តប្តាត់ដំបង រួមទាំងមន្ត្រីកងរាជអ៊ាវធហត្ថដែលបានឃុបឃិតនាំប្រភេទឈើគ្រញូងចេញខុសច្បាប់ប្រឆាំងទៅនឹងបទបញ្ជាលេខ ០២ របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបែបហ្នឹង គឺមានន័យស្មើនឹងប្រឆាំងបទបញ្ជារបស់លោកនាយករដ្ឋមន្ត្រី។ ព្រោះបទបញ្ជាតម្រូវឱ្យសមត្ថកិច្ចគ្រប់លំដាប់ថ្នាក់ត្រូវចុះអនុវត្តបង្ក្រាបបទល្មើសដោយតម្រូវឱ្យដុតបំផ្លាញចោលថែមទៀតផង ព្រោះឈើគ្រញូងវាបានបង្កឱ្យពលរដ្ឋខ្មែរឆ្លងដែនចូលទៅកាន់ទឹកដីថៃ រហូតមានការបាញ់សម្លាប់ជាច្រើនអ្នក ក្នុងរយៈកាលកន្លងមកបង្កឱ្យមានវិវាទបញ្ហាការទូតរវាងកម្ពុជា និងថៃ នៅតែមិនទាន់បានដោះស្រាយឱ្យបានចប់នៅ ឡើយទេ ។
ចុះបើមន្ត្រីជំនាញខេត្តបាត់ដំបង រួមទាំងមន្ត្រីកងរាជអាវុធហត្ថដែលមានលោក ហ៊ីង វាសនា ជាអ្នកកាងឈើនាំចេញពីទឹកដីស្រុកសំឡូត រហូតមកដល់ភ្នំពេញទៅហើយនោះ តើបទបញ្ជាលេខ ០២ របស់លោកនាយករដ្ឋ មន្ត្រី ក្នុងករណីបង្ក្រាបបទល្មើសឈើគ្រញូង វាមានន័យអ្វីទៅ ។ ម៉្យាងវិញទៀតបទបញ្ជាលេខ ០២ របស់នាយករដ្ឋ មន្ត្រី គឺសំដៅឱ្យមន្ត្រីជាកងកម្លាំង និងមន្ត្រីជំនាញសហការគ្នា ដើម្បីទប់ស្កាត់បទល្មើសដឹកឈើគ្រញូង ប៉ុន្តែបើមន្ត្រីជំនាញនិងកម្លាំងកងរាជអាវុធហត្ថយកតួនាទីទៅកាងបទល្មើសទៅហើយនោះ តើប្រសិទ្ធភាពនៃបទបញ្ជារបស់នាយករដ្ឋមន្ត្រីអាចទទួលបានជោគជ័យដោយរបៀបណា ?…៕
