បន្ទាយមានជ័យ៖ អ្នកទោសជាជនជាតិថៃ ចំនូន៥នាក់ ក្នុងនោះមាន២នាក់ ដែលត្រូវបានដោះលែងឲ្យ មានសេរីភាព រួចហើយត្រូវបានភាគីកម្ពុជា ធ្វើបស្យាប័ណ្ណ ប្រគល់ទៅឲ្យភាគីថៃ កាលពីព្រឹកថ្ងៃទី២០ ខែកុម្ភៈ ឆ្នាំ២០១៤ នៅព័ន្ធធនាគារ ខេត្តបន្ទាយមានជ័យ តាមច្រកទ្វារ ព្រំដែនអន្តជាតិប៉ោយប៉ែត ក្រោមការផ្ទេរ ពីសំណាក់លោក ឈុំ វណ្ណរិទ្ធ អភិបាលរង ខេត្តបន្ទាយមានជ័យ លោក វរសេនីយ៍ត្រី ស៊ិន សុផល ប្រធានព័ន្ធធនាគារ ខេត្តបន្ទាយមានជ័យ ព្រមទាំងព្រះរាជអាជ្ញារងខេត្ត និងមន្រ្តីស្ថានអគ្គរាជទូតថៃ និងមន្រ្តីពន្ធធនាគារថៃ ប្រហែល១០នាក់។
លោក ស៊ិន សុផល ប្រធានព័ន្ធធនាគារ ខេត្តបន្ទាយមានជ័យ បានឲ្យដឹងថា ការប្រគល់អ្នកទោសជាជនជាតិថៃ ឲ្យភាគីថៃនេះ ធ្វើឡើងតាមការស្នើសុំ របស់ស្ថានអគ្គរាជទូតថៃ ចំនួន៥នាក់ ពីព័ន្ធធនាគារ ខេត្តបន្ទាយមានជ័យ ទៅឃុំបន្តនៅប្រទេសថៃ ក្នុងនោះមាន២នាក់មានឈ្មោះ ១. ភី លីតប៊ុននី ភេទប្រុស អាយុ២៤ឆ្នាំ ឃាត់ខ្លួនថ្ងៃទី៣០ ខែមករា ឆ្នាំ២០១១ពីបទលក់គ្រឿងញៀន ជាប់គុករយៈពេល៣ឆ្នាំ ហើយត្រូវដោះលែង ថ្ងៃទី៣០ ខែមករា ឆ្នាំ២០១៤ ២.ថាក លឿនស ភេទប្រុស អាយុ២៤ឆ្នាំជាប់គុកភ ចាប់នៅថ្ងៃទី៣០ ខែមករា ឆ្នាំ២០១១ ពីបទលក់គ្រឿងញៀន ជាប់គុក៣ឆ្នាំដោះលែង ថ្ងៃទី៣០ ខែមករា ឆ្នាំ២០១៤ ។
ដោយឡែក៣នាក់ទៀត ដែលត្រូវប្រគល់ជូននេះ មានឈ្មោះ ១. មានឈ្មោះ ភិន អនណា ភេទប្រុស កើតនៅឆ្នាំ១៩៦៤ ចាប់ខ្លួនថ្ងៃទី៥ ខែមិនា ឆ្នាំ២០១០ បទល្មើសឆ្លងដែន និងប្រើប្រាស់អាវុធគ្រឿងផ្ទុះ ចូលមកកម្ពុជា ដោយគ្មាន ការអនុញ្ញាត កំណត់ទោស ៥ឆ្នាំ ២.មានឈ្មោះ ថងដែនយ៉ាក់ក្លា ភេទប្រុស អាយុ៦៤ឆ្នាំ ចាប់ខ្លួនថ្ងៃទី៥ ខែមិនា ឆ្នាំ២០១០ បទល្មើសឆ្លងដែន និងប្រើអាវុធគ្រឿងផ្ទុះ ចូលមកកម្ពុជាដោយ គ្មានការអនុញ្ញាត ចំនួនទោសជាប់គុក ៥ឆ្នាំ ៣.ឈ្មោះ ស៊ុតចៃ វ៉ាន់ប្រាក់ស៊ុម ភេទស្រី អាយុ៣៥ឆ្នាំ ចាប់ខ្លួនថ្ងៃទី១២ ខែតុលា ឆ្នាំ២០០៦ ពីបទផ្សំគំនិត ទិញដូរគ្រឿងញៀន ជាប់គុកចំនួន២០ឆ្នាំ ។
លោកឈុំ វណ្ណារិទ្ធ អភិបាលរង ខេត្តបន្ទាយមានជ័យ ដែលមានវត្តមាន ក្នុងការផ្ទេរផ្ទូនេះ បាននិយាយថា ការប្រគល់អ្នកទោស ចំនួន៣នាក់ខាងលើ ទៅឲ្យភាគីថៃ គឺធ្វើឡើងទៅបានដោយកម្ពុជា និងថៃបានចុះ អនុស្សារណៈ យោគយល់គ្នាក្នុងការផ្ទេរផ្ទូ អ្នកទោសថៃ ហើយនេះជា លើកទី២ហើយ ដែលប្រទេសថៃ និងប្រទេសកម្ពុជា បានប្រគល់អ្នកទោសជាជនជាតិថៃ ពីកម្ពុជាបញ្ជូនទៅ ដាក់ព័ន្ធធនាគារ នៅប្រទេសថៃវិញ ៕
អ្នកប្រម៉ាញ់ជាយដែន
